പട്ടാമ്പി: കേരള വ്യാപാരി വ്യവസായി ഏകോപനസമിതി വല്ലപ്പുഴ യൂനിറ്റ് 32ാം വാര്‍ഷിക സമ്മേളനം ഇന്ന് നടക്കും. വൈകിട്ട് അഞ്ചിന് വല്ലപ്പുഴ കല്ലുകൂട്ടത്തില്‍നിന്ന് ബ്ലൂ വളണ്ടിയര്‍ മാര്‍ച്ച് ആരംഭിക്കും. ഗെയ്റ്റില്‍ കെ.പി. ഉമ്മര്‍ഹാജി നഗറില്‍ നടക്കുന്ന സമ്മേളനം സമിതി സംസ്ഥാന ജനറല്‍ സെക്രട്ടറി ജോബി വി. ചുങ്കത്ത് ഉദ്ഘാടനം ചെയ്യും.
50വയസ് പൂര്‍ത്തിയായ യൂനിറ്റിലെ എല്ലാ വ്യാപാരികള്‍ക്കും പ്രതിവര്‍ഷ പെന്‍ഷന്‍ നല്‍കുന്നുണ്ടെന്ന് യൂനിറ്റ് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. വിദ്യാര്‍ഥികള്‍ക്ക് സ്‌കോളര്‍ഷിപ്പ്, നിര്‍ധനര്‍ക്ക് ചികിത്സാ സഹായം, വിവാഹ ധനസഹായം തുടങ്ങി ജീവകാരുണ്യപ്രവര്‍ത്തനങ്ങള്‍ക്ക് നേതൃത്വം നല്‍കുന്നതായും ഭാരവാഹികളായ സലീം പാറക്കല്‍, സി.കെ. ഉബൈദ്, എം. മണികണ്ഠന്‍, ദാവൂദ് ഹാജി, അബ്ദുല്‍റസാഖ്, അലി പുല്ലാനി, ഇബ്രാഹിം, നൗഫല്‍, നവാസ്, ഉമറുല്‍ഫാറൂഖ് അറിയിച്ചു. സമ്മേളനത്തിന്റെ വിളംബരം അറിയിച്ച് വല്ലപ്പുഴയില്‍ വ്യാപാരികള്‍ ജാഥ നടത്തി.