തിരുവനന്തപുരം: വിവിധ ദുരന്തങ്ങള്‍ കൈകാര്യം ചെയ്യുന്നതിന് സംസ്ഥാനങ്ങളില്‍ പ്രയോഗത്തിലുള്ള ഫലപ്രദമായ മാര്‍ഗങ്ങള്‍ ഉള്‍പ്പെടുത്തി ദേശീയ സൈക്ലോണ്‍ പ്ലാന്‍ വികസിപ്പിക്കണമെന്ന് പഠന റിപ്പോര്‍ട്ട്.
ഓഖി കൊടുങ്കാറ്റ് വിതച്ച ദുരന്തത്തിന്റെ പശ്ചാത്തലത്തില്‍ ഐക്യരാഷ്ട്ര സഭയുടെ ഭക്ഷ്യ, കാര്‍ഷിക സംഘടനയുടെ പിന്തുണയുള്ള ഇന്റര്‍നാഷനല്‍ കലക്ടീവ് ഇന്‍ സപ്പോര്‍ട്ട് ഓഫ് ഫിഷ് വര്‍ക്കേഴ്‌സ്(ഐ.സി.എസ്.എഫ്) എന്ന സംഘടന നടത്തിയ പഠനത്തിലാണ് ഇക്കാര്യം വ്യക്തമാക്കുന്നത്.
ദുരന്തങ്ങള്‍മൂലം മത്സ്യമേഖലയില്‍ ജീവനും ജീവനോപാധികള്‍ക്കും സംഭവിക്കുന്ന നാശനഷ്ടങ്ങള്‍ ലഘൂകരിക്കുന്നതിന് സഹായകമായ കേന്ദ്ര-സംസ്ഥാന നയപരിപാടികള്‍, ദുരന്ത നിവാരണ പ്രവര്‍ത്തനങ്ങള്‍, മുന്നൊരുക്കങ്ങള്‍, മുന്നറിയിപ്പ് സംവിധാനങ്ങള്‍ എന്നിവ നിലവിലുള്ള ചെറുകിട മത്സ്യബന്ധന മാര്‍ഗനിര്‍ദേശങ്ങളുമായി എത്രത്തോളം യോജിച്ചുപോകുന്നു എന്നു വിലയിരുത്തുന്നതുകൂടിയാണ് ഐ.സി.എസ്.എഫിന്റെ പഠനം. കടലോര സംസ്ഥാനങ്ങളും കേന്ദ്ര സര്‍ക്കാരും തമ്മിലുള്ള നിരന്തരമായ സഹകരണവും ഏകോപനവും ഊട്ടിയുറപ്പിക്കുന്ന തരത്തിലുള്ള ഒരു കേന്ദ്ര നിയമത്തിന്റെ ആവശ്യകത ഈ പഠനത്തില്‍ അടിവരയിട്ടു പറയുന്നു.