കോട്ടയം : ദുരഭിമാനത്തിന്റെ പേരില്‍ നട്ടാശേരി എസ്.എച്ച് മൗണ്ടില്‍ ജോസഫ് ജേക്കബിന്റെ മകന്‍ കെവിനെ തട്ടിക്കൊണ്ടു പോയി കൊലപ്പെടുത്തിയ കേസില്‍ മുഖ്യപ്രതി ഷാനു ചാക്കോയ്ക്കായി തിരച്ചില്‍ തുടരുന്നു.

കെവിന്റെ ഭാര്യാ സഹോദരനായ ഷാനു തിരുവനന്തപുരം വഴി തമിഴ്‌നാട്ടിലേക്കു കടന്നതായി സൂചനയുണ്ട്. കഴിഞ്ഞ ദിവസം ഇയാള്‍ തിരുവനന്തപുരത്തു വന്നതായി പൊലിസിനു സൂചന ലഭിച്ചിരുന്നു.

ഇയാള്‍ക്കെതിരേ പൊലിസ് ലുക്ക് ഔട്ട് നോട്ടിസ് പുറപ്പെടുവിച്ചിട്ടുണ്ട്. പുനലൂര്‍ ഡിവൈ.എസ്.പിയാണ് ലുക്ക് ഔട്ട് നോട്ടിസ് പുറപ്പെടുവിച്ചത്.

കൊലപാതകം നടത്തിയ ശേഷം ഷാനു തിരുവനന്തപുരത്തെ ഭാര്യവീട്ടില്‍ എത്തിയതായി പൊലിസിനു വിവരം ലഭിച്ചു. ഇതേ തുടര്‍ന്ന് പൊലിസ് ഷാനുവിന്റെ ഭാര്യവീട്ടില്‍ പരിശോധന നടത്തിയിരുന്നു.