പാവറട്ടി: വെന്മേനാട് എംഎ എസ്എം ഹയര്‍ സെക്കന്‍ഡറി സ്‌കൂളിലെ അധ്യായന വര്‍ഷ സമാപന ആഘോഷത്തിനിടയില്‍ ഗുണ്ട് പൊട്ടിച്ചുവെന്നാരോപിച്ച് സുഹൃത്തിന്റെ വീട്ടിലെത്തിയ പൂര്‍വ വിദ്യാര്‍ഥിയായ യുവാവിനെ പാവറട്ടി പൊലിസ് മര്‍ദിച്ചതായി പരാതി.സ്‌കൂളിലെ പൂര്‍വ വിദ്യാര്‍ഥിയും വെന്മേനാട് സ്വദേശിയുമായ നാലകത്ത് കൂളിയില്‍ അബുവിന്റെ മകന്‍ ഇസ്മാഈല്‍ 20ന് ആണ് മര്‍ദനമേറ്റത്. തലക്ക് പിറകിലും മുഖത്തും തണ്ടലിലുമാണ് പാവറട്ടി എ.എസ്.ഐ പ്രഭാകരന്‍ മര്‍ദിച്ചതെന്ന് പരുക്കേറ്റ് ചികിത്സയിലുള്ള ഇസ്മാഈല്‍ പറയുന്നു. ചൊവ്വാഴ്ചയാണ് സംഭവം.
എന്നാല്‍ അധ്യായന അവസാന ആഘോഷത്തില്‍ പ്രശ്‌നങ്ങളുണ്ടാകാന്‍ സാധ്യതയുണ്ടെന്ന് സ്‌കൂള്‍ അധികൃതര്‍ രേഖാമൂലം ആവശ്യപെട്ടതനുസരിച്ചാണ് എത്തിയതെന്നും തുടര്‍ന്ന് ഇസ്മാഈലിനെ അറസ്റ്റ് ചെയ്ത് കൊണ്ട് വരികയും സ്റ്റേഷന്‍ ജാമ്യത്തില്‍ വിട്ടയക്കുകയും മാത്രമാണ് ചെയ്തതെന്നും മര്‍ദിച്ചിട്ടില്ലെന്നുമാണ് പാവറട്ടി എസ്.ഐ അരുണ്‍ ഷാ പറയുന്നത്. എന്നാല്‍ ആരോപണ വിധേയനായ എ.എസ്.ഐ പ്രഭാകരനെതിരെ ഇതിന് മുമ്പും മര്‍ദന പരാതി ഉയര്‍ന്നിരുന്നു. കഴിഞ്ഞ കരുവന്തല ഉത്സവത്തിനിടയില്‍ സി പി ഐ എം പുളിക്കകടവ് ബ്രാഞ്ച് സെക്രട്ടറി സി എസ് രമേശനെ മുഖത്തടിച്ച് കണ്ണട പൊട്ടിച്ചിരുന്നു.അനധികൃതമായി വാഹനം പാര്‍ക്ക് ചെയ്തുവെന്നാരോപിച്ചായിരുന്നു മര്‍ദനം. ഇതു മാ യി ബ ന്ധപെട്ട് രമേശന്‍ ഉയര്‍ന്ന ഉദ്യോഗസ്ഥര്‍ക്കും മുഖ്യമന്ത്രിക്കും പരാതി നല്‍കിയിരുന്നു. ചൊവ്വാഴ്ച എ എസ് ഐ യുടെ മര്‍ദനമേറ്റ ഇസ്മായില്‍ കേരള പ്രവാസി സംഘം മണലൂര്‍ ഏരിയാ സെക്രട്ടറി എന്‍ കെ കമാലിന്റെ സഹോദരി പുത്രനാണ്.