തൃശൂര്‍: ചേര്‍പ്പ് ഗവ. ഹയര്‍ സെക്കന്‍ഡറി സ്‌കൂള്‍ നാഷണല്‍ സര്‍വീസ് സ്‌കീം യൂണിറ്റിന്റെ നേതൃത്വത്തില്‍ നിര്‍മിച്ച 'എന്റെ ലഹരി' ഡോക്യുമെന്ററി പ്രദര്‍ശനം നാളെ ഉച്ചയ്ക്ക് രണ്ടിന് ടൗണ്‍ ഹാളില്‍ നടത്തും.
മദ്യവും മയക്കുമരുന്നും ഒഴിവാക്കി ജീവിതത്തിലെ യാഥാര്‍ഥ ലഹരി എന്താകണമെന്ന് കേരളത്തിലെ സാമൂഹിക, സാഹിത്യ, രാഷ്ട്രീയ, സാംസ്‌കാരിക രംഗത്തെ പ്രമുഖര്‍ ഡോക്യുമെന്ററില്‍ വിശകലനം ചെയ്യുന്നുണ്ടെന്ന് എന്‍എസ്എസ് പ്രോഗ്രാം ഓഫീസര്‍ പി.ടി.ബൈജു വാര്‍ത്താസമ്മേളനത്തില്‍ പറഞ്ഞു. സാഹിത്യകാരനും തിരക്കഥാകൃത്തുമായ മാടമ്പു കുഞ്ഞുകുട്ടന്‍ ഗുരുനാഥനും ചേര്‍പ്പ് ഗവ. ഹയര്‍ സെക്കന്‍ഡറി സ്‌കൂളിലെ എന്‍എസ്എസ് വളണ്ടിയേഴ്‌സ് വിദ്യാര്‍ഥികളായും ഡോക്യുമെന്ററിയില്‍ വേഷമിടുന്നു.
ഡോക്യുമെന്ററി പ്രദര്‍ശനത്തിന്റെ ഉദ്ഘാടനം മന്ത്രി വി.എസ്.സുനില്‍കുമാര്‍ നിര്‍വഹിക്കും. ചടങ്ങില്‍ ജില്ലാ പഞ്ചായത്ത് പ്രസിഡന്റ് ഷീല വിജയകുമാര്‍ അധ്യക്ഷനാകും. ഡെപ്യൂട്ടി മേയര്‍ വര്‍ഗീസ് കണ്ടംകുളത്തി മുഖ്യാതിഥിയാകും. എന്‍എസ്എസ് സ്റ്റേറ്റ് പ്രോഗ്രാം കോഓര്‍ഡിനേറ്റര്‍ എ.സുബൈര്‍കുട്ടി തുടങ്ങിയവര്‍ പങ്കെടുക്കും. വാര്‍ത്താസമ്മേളനത്തില്‍ പി.ടി.എ പ്രസിഡന്റ് വി.എച്ച് ഹുസൈന്‍, പി.ടി.എ പ്രതിനിധി പ്രസന്നന്‍ വലിയങ്ങോട്ട്, ഡോക്യുമെന്ററി സംവിധായകന്‍ സുരേഷ് മച്ചാട് പങ്കെടുത്തു.