വടക്കാഞ്ചേരി: തെക്കുംകര പഞ്ചായത്തില്‍ വരുന്ന പുന്നംപറമ്പ് ഗ്രൗണ്ടിന്റെ നവീകരണ പ്രവര്‍ത്തനങ്ങള്‍ക്കു 50 ലക്ഷം രൂപ അനുവദിക്കുമെന്നു മന്ത്രി എ.സി മൊയ്തീന്‍ അറിയിച്ചു.
1995-2000 സാമ്പത്തിക വര്‍ഷത്തില്‍ ഷെയ്ക്ക് അബ്ദുള്ള പഞ്ചായത്ത് പ്രസിഡന്റായിരിക്കുമ്പോഴാണു മച്ചാട് ഗവണ്‍മെന്റ് ഹയര്‍ സെക്കന്‍ഡറി സ്‌കൂളിനു പുറകു വശത്തായി രണ്ട് ഏക്കറോളം സ്ഥലം ഗ്രൗണ്ടിനായി വാങ്ങിയത് . വര്‍ഷം തോറും പഞ്ചായത്തിന്റെ നേതൃത്വത്തില്‍ സംഘടിപ്പിക്കാറുള്ള കേരളോത്സവം ഉള്‍പ്പടെയുള്ള വിവിധ പരിപാടികളും മച്ചാട് ഗവ.ഹയര്‍ സെക്കന്‍ഡറി സ്‌കൂളിലെ പരിപാടികളുമാണു ഇപ്പോള്‍ ഗ്രൗണ്ടില്‍ നടത്തുന്നത്.
മഴ കാലമായാല്‍ ഗ്രൗണ്ട് ഉപയോഗിക്കാന്‍ കഴിയാത്ത അവസ്ഥയായിരുന്നു. അതുകൊണ്ടു തന്നെ ആധുനിക രീതിയില്‍ നവീകരിക്കാന്‍ ഫണ്ട് നല്‍കണമെന്നു തെക്കുംകര പഞ്ചായത്ത് ഭരണസമിതി ആവശ്യപ്പെട്ടതിന്റെ അടിസ്ഥാനത്തിലാണു കായിക വകുപ്പിന്റെ ചുമതല കൂടിയുള്ള മന്ത്രി 50 ലക്ഷം രൂപ അനുവദിച്ചത്.