കൂത്തുപറമ്പ്: കണ്ടംകുന്നില്‍ യുവതിക്കുനേരെ ആസിഡ് ആക്രമണം. ലക്ഷം വീട് കോളനിയിലെ കോമത്ത് വളപ്പില്‍ ഹൗസില്‍ രതി (35)ക്കു നേരെയാണ് ആക്രമണം ഉണ്ടായത്.
ഇന്നലെ പുലര്‍ച്ചെ നാലോടെയാണ് സംഭവം. പുലര്‍ച്ചെ ജോലിക്ക് പോകുന്നതിനിടെയാണ് പാചകത്തൊഴിലാളിയായ രതിയുടെ മുഖത്ത് ആസിഡ് ഒഴിച്ചത്. തുടര്‍ന്ന് മുഖത്തും കഴുത്തിനും പൊള്ളലേറ്റ രതി സമീപത്തെ വീട്ടിലേക്ക് ഓടിക്കയറുകയായിരുന്നു. ഉടന്‍ വിവരമറിഞ്ഞെത്തിയ നാട്ടുകാരും കൂത്തുപറമ്പ് പൊലിസും ചേര്‍ന്ന് യുവതിയെ ആദ്യം കൂത്തുപറമ്പ് താലൂക്കാശുപത്രിയിലും പരുക്ക് ഗുരുതരമായതിനാല്‍ പിന്നീട് പരിയാരം മെഡിക്കല്‍ കോളജിലും പ്രവേശിപ്പിച്ചു. ആശുപത്രിയില്‍വച്ച് രതിയില്‍നിന്ന് മൊഴി രേഖപ്പെടുത്തിയ പൊലിസ് പ്രതിയെ കണ്ടെത്താനായി അന്വേഷണം ഊര്‍ജിതമാക്കി. ഭര്‍ത്താവ് മരണപ്പെട്ട രതിക്ക് രണ്ട് മക്കളാണ്.