ആലപ്പുഴ: ചേര്‍ത്തലയില്‍ വെള്ളത്തില്‍ കിടന്ന് പ്രതിഷേധം. വീടുകളിലും പരിസരങ്ങളിലും വെള്ളം കയറിയതിനെ തുടര്‍ന്നാണ് നാട്ടുകാര്‍ വെള്ളത്തില്‍ കിടന്ന് പ്രതിഷേധിച്ചത്. ദേശീയപാത നിര്‍മാണത്തിലെ അപാകതകളാണ് പ്രദേശത്തെ രൂക്ഷമായ വെള്ളക്കെട്ടിന് കാരണമെന്ന് നാട്ടുക്കാര്‍ പറഞ്ഞു.

ചേര്‍ത്തലയില്‍ ഏറെ നാളുകളായി ഈ പ്രശ്‌നം നിലനില്‍ക്കുന്നുണ്ടെന്നും ദേശീയപാത നിര്‍മാണം ആരംഭിച്ചതിന് ശേഷമാണ് സ്ഥിതി കൂടുതല്‍ വഷളായതെന്നും പ്രദേശവാസികള്‍ വ്യക്തമാക്കി. നിര്‍മാണ പ്രവര്‍ത്തനങ്ങളുടെ ഭാഗമായി പലയിടങ്ങളിലും വെള്ളത്തിന്റെ സ്വാഭാവിക ഒഴുക്ക് തടസപ്പെട്ടതോടെയാണ് പ്രദേശവാസികള്‍ ദുരിന്തത്തിലായത്.

ALSO READ: നീറ്റ് പുനഃപരീക്ഷ: ചോദ്യപേപ്പര്‍ എത്തിക്കാന്‍ വ്യോമസേനയുടെ ഹെലികോപ്റ്ററുകള്‍; പരീക്ഷ നടത്തിപ്പില്‍ അതീവ സുരക്ഷ ഉറപ്പാക്കാന്‍ കേന്ദ്രം 

തോട് കരകവിഞ്ഞൊഴുകി വീടുകളിലേക്ക് വെള്ളം കയറുന്നു. ഇതിലൂടെ നഗരത്തിലെ മാലിന്യങ്ങളും ശുചിമുറി മാലിന്യങ്ങളും കലര്‍ന്ന വെള്ളം വീടുകളിലേക്ക് ഒഴുകിയെത്തുന്നു. ഇതുമൂലം ഭക്ഷണം കഴിക്കാനോ വീടുകളില്‍ സ്വസ്ഥമായി കഴിയാനോ സാധിക്കാത്ത അവസ്ഥയാണെന്ന് നാട്ടുക്കാര്‍ പറയുന്നു.

സംഭവം ശ്രദ്ധയില്‍പ്പെട്ടതോടെ ബന്ധപ്പെട്ട അധികൃതര്‍ സ്ഥലത്തെത്തി സ്ഥിതിഗതികള്‍ വിലയിരുത്തി. വൈകുന്നേരം ഏഴുമണിയോടെ തോട്ടിലെ തടസങ്ങള്‍ നീക്കം ചെയ്യുമെന്ന് അധികൃതര്‍ ഉറപ്പ് നല്‍കി.

ദേശീയപാത അതോറിറ്റി ആവശ്യമായ നടപടികള്‍ സ്വീകരിക്കുമെന്നും അറിയിച്ചു. തടസം നീക്കിയില്ലെങ്കില്‍ നഗരസഭ നേരിട്ട് ഇടപെട്ട് പൊളിച്ചുനീക്കുമെന്നാണ് നഗരസഭ ചെയര്‍പേഴ്‌സണ്‍ അറിയിച്ചത്.

പ്രശ്‌നത്തിന് അടിയന്തര പരിഹാരം ഉണ്ടായില്ലെങ്കില്‍ ദേശീയപാത അതോറിറ്റിക്കെതിരേ ശക്തമായ ജനകീയ പ്രതിഷേധം സംഘടിപ്പിക്കുമെന്നും നാട്ടുകാര്‍ മുന്നറിയിപ്പ് നല്‍കി.

Residents staged a protest by lying in the water after flooding affected their homes and surroundings. They alleged that flaws in the national highway construction caused severe waterlogging in the area.