തിരുവനന്തപുരം: സംസ്ഥാനത്തെ എം.ബി.ബി.എസ് വിദ്യാർഥികളിൽ നിന്ന് അധികമായി ഈടാക്കിയ ഫീസ് തിരികെ നൽകാൻ നാഷനൽ മെഡിക്കൽ കമ്മിഷൻ നിർദേശം നൽകി. നാലര വർഷം ദൈർഘ്യമുള്ള എം.ബി.ബി.എസ് കോഴ്‌സിന് അഞ്ച് വർഷത്തെ ഫീസ് ഈടാക്കുന്നതിനെതിരേയാണ് നടപടി. 

കോഴ്‌സിന്റെ കാലാവധി 54 മാസമാണെങ്കിലും മെഡിക്കൽ കോളജുകൾ അധികമായി ആറുമാസത്തെ ഫീസ് കൂടി ഈടാക്കുന്നു.

ഇത്തരത്തിൽ ഫീസ് ഈടാക്കരുതെന്ന് നേരത്തെ തന്നെ നാഷനൽ മെഡിക്കൽ കമ്മിഷൻ നിർദേശിച്ചിരുന്നെങ്കിലും സംസ്ഥാനത്ത് ഇത് പൂർണമായി നടപ്പാക്കിയിരുന്നില്ല. ഇതിനെതിരേ വിദ്യാർഥികളുടെയും രക്ഷിതാക്കളുടെയും സംഘടനകൾ കമ്മിഷനെ സമീപിക്കുകയായിരുന്നു.

പരാതി പരിശോധിച്ച ശേഷമാണ് അധികമായി ഈടാക്കിയ തുക വിദ്യാർഥികൾക്ക് തിരിച്ചുനൽകാൻ കമ്മിഷൻ നിർദേശം നൽകിയത്. നിലവിൽ വിവിധ കോളജുകൾ വിദ്യാർഥികളിൽ നിന്ന് 3.5 ലക്ഷം മുതൽ 6 ലക്ഷം രൂപ വരെ അധികമായി ഈടാക്കിയിട്ടുണ്ടെന്നാണ് വിവരം.

എൻ.എം.സിയുടെ നിർദേശത്തോടെ സംസ്ഥാനത്തെ നിരവധി എം.ബി.ബി.എസ് വിദ്യാർഥികൾക്കും രക്ഷിതാക്കൾക്കും സാമ്പത്തിക ആശ്വാസമാകുമെന്നാണ് വിലയിരുത്തൽ.