നടുവണ്ണൂര്‍: കോട്ടൂര്‍ പഞ്ചായത്തില്‍ നിപാ വൈറസ് ബാധയേറ്റ് ഒരാള്‍ മരിച്ചതിന്റെ ആഘാതം വിട്ടൊഴിയും മുന്‍പ് മറ്റൊരു മരണം കൂടി. അപ്രതീക്ഷിതമായാണ് നാടിനെ ആശങ്കയിലാഴ്ത്തി റസില്‍ യാത്ര പറഞ്ഞിറങ്ങിയത്.
കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലായിരുന്ന കോട്ടൂരിലെ പൂനത്ത് നെല്ലിയുള്ളതില്‍ റസില്‍ (26) ആണ് ഇന്നലെ വൈകിട്ട് മരിച്ചത്. മെയ് 20നാണ് നിപാ ബാധിച്ച് തിരുവോട് മൈപ്പില്‍ ഇസ്മാഈല്‍ മരിച്ചത്. പതിനൊന്നാം നാളില്‍ റസിലും നാടിന്റെ കണ്ണീര്‍ക്കാഴ്ചയായി മാറി.
അതേസമയം ഇസ്മാഈലിന്റെ മരണത്തിനു ശേഷം പ്രദേശം നിപായ്‌ക്കെതിരേ കനത്ത ജാഗ്രതയിലായിരുന്നു. പൊടുന്നനെ തേടിയെത്തിയ റസിലിന്റെ മരണത്തില്‍ നാടിന് കനത്ത ആഘാതമായി. മെഡിക്കല്‍ കോളജ് ആശുപത്രിയിലെ ജനറല്‍ വാര്‍ഡില്‍ കിടന്നപ്പോള്‍ നടത്തിയ രക്തപരിശോധനയില്‍ കുഴപ്പമില്ലെന്നറിഞ്ഞതോടെ മാതാപിതാക്കളും ബന്ധുക്കളും നാട്ടുകാരും ആശ്വസിച്ചിരുന്നു.
എന്നാല്‍ കഴിഞ്ഞദിവസം അസുഖം മൂര്‍ച്ഛിച്ചു. സ്ഥിതി മോശമാവുകയും ചെയ്തതോടെ പ്രത്യേക വാര്‍ഡിലേക്കു മാറ്റി. ഇന്നലെ വൈകിട്ട് നാലിനു മരണം സംഭവിക്കുകയും ചെയ്തു. യുവമോര്‍ച്ച കോട്ടൂര്‍ പഞ്ചായത്ത് വൈസ് പ്രസിഡന്റായിരുന്നു റസില്‍.