വടക്കാഞ്ചേരി : ജില്ലാ ആശുപത്രിയില്‍ വര്‍ഷങ്ങളുടെ ഇടവേളയ്ക്കു ശേഷം വീണ്ടും പോസ്റ്റ് മോര്‍ട്ടം .
താലൂക്കാശുപത്രി ജില്ലാ ആശുപത്രിയായി ഉയര്‍ത്തിയിട്ടും അടിസ്ഥാന സൗകര്യങ്ങളില്ലെന്ന പേരില്‍ പോസ്റ്റ്‌മോര്‍ട്ടം മുടങ്ങി കിടക്കുകയായിരുന്നു.
ആശുപത്രി ജീവനക്കാരുടെ അനാസ്ഥ മൂലമായിരുന്നു പോസ്റ്റ് മോര്‍ട്ടം നടക്കാതെ പോയിരുന്നത്. ഇതു ജനങ്ങള്‍ക്കു വലിയ ദുരിതം സമ്മാനിക്കുകയും ചെയ്തിരുന്നു.
ജില്ലാ ആശുപത്രിയില്‍ മരണം സംഭവിച്ചെത്തുന്ന മൃതദേഹങ്ങളെല്ലാം മെഡിക്കല്‍ കോളജിലേക്കു പറഞ്ഞു വിടുകയാണു ചെയ്തിരുന്നത്. ഇന്നലെ മുള്ളൂര്‍ക്കരയില്‍ തൂങ്ങി മരിച്ച യുവാവിന്റെ മൃതദേഹം എത്തിച്ചപ്പോഴും ഡോക്ടര്‍മാരും ആശുപത്രി ജീവനക്കാരും പതിവു പല്ലവി ആവര്‍ത്തിച്ചു.
ഇതോടെ ജനതാദള്‍ യു.ഡി.എഫ് വിഭാഗം പ്രവര്‍ത്തകര്‍ പ്രശ്‌നത്തില്‍ ഇടപെടുകയും ജില്ലാ ആശുപത്രിയില്‍ പോസ്റ്റ് മോര്‍ട്ടം നടത്തണമെന്നു ആവശ്യപ്പെടുകയുമായിരുന്നു.
വെള്ളവും സൗകര്യവുമില്ലെന്നു അധികൃതര്‍ അറിയിച്ചെങ്കിലും ജനതാദള്‍ പ്രവര്‍ത്തകര്‍ അതു അംഗീകരിച്ചില്ല.
നാട്ടുകാര്‍ പ്രദേശത്തു തടിച്ചു കൂടിയതോടെ പോസ്റ്റ്‌മോര്‍ട്ടത്തിനു ഡോക്ടര്‍മാര്‍ തയ്യാറാവുകയായിരുന്നു. ആശുപത്രി സൂപ്രണ്ട് വി. പ്രേമകുമാര്‍ , ഇ.എന്‍.ടി വിഭാഗം ഡോ. ഹസീന എന്നിവരുടെ നേതൃത്വത്തിലായിരുന്നു പോസ്റ്റ്‌മോര്‍ട്ടം.