ലക്‌നൗ: രാജ്യത്തിന്റെ വിവിധ ഭാഗങ്ങളിലെ ജോലിസ്ഥലങ്ങളില്‍നിന്നു കാല്‍നടയായും അല്ലാതെയും തിരിച്ചെത്തിയവര്‍ക്കു 14 ദിവസത്തെ നിരീക്ഷണം നിര്‍ബന്ധമാക്കി യു.പിയും ബിഹാറും. സര്‍ക്കാരിനു കീഴില്‍ പ്രവര്‍ത്തിക്കുന്ന ക്യാംപുകളില്‍ ഇവര്‍ എത്തണമെന്നാണ് നിര്‍ദേശം.
ഇത്തരത്തില്‍ തിരിച്ചെത്തിയവരെ കണ്ടെത്താന്‍ യു.പി മുഖ്യമന്ത്രി യോഗി ആദിത്യനാഥ് എല്ലാ ജില്ലാ ഭരണകൂടങ്ങള്‍ക്കും നിര്‍ദേശം നല്‍കിയിട്ടുണ്ട്. ഇവര്‍ക്കായി റിലീഫ് ക്യാംപുകള്‍ തുറന്ന് അവിടേയ്ക്കു മാറ്റാനാണ് ബിഹാര്‍ മുഖ്യമന്ത്രി നിതീഷ് കുമാര്‍ നിര്‍ദേശിച്ചിരിക്കുന്നത്.
മഹാരാഷ്ട്രയില്‍ ഇത്തരത്തിലുള്ള തൊഴിലാളികള്‍ക്ക് എല്ലാ സൗകര്യവുമൊരുക്കുമെന്നു വ്യക്തമാക്കി മുഖ്യമന്ത്രി ഉദ്ധവ് താക്കറെ രംഗത്തെത്തി. ആരും ഈ സാഹചര്യത്തില്‍ സംസ്ഥാനം വിടരുതെന്നും അദ്ദേഹം നിര്‍ദേശം നല്‍കിയിട്ടുണ്ട്. ഈ സാഹചര്യത്തില്‍ സ്വന്തം നാടുകളിലേയ്ക്കു മടങ്ങരുതെന്ന് അഭ്യര്‍ഥിച്ച് ഡല്‍ഹി മുഖ്യമന്ത്രി അരവിന്ദ് കെജ്‌രിവാളും രംഗത്തെത്തിയിട്ടുണ്ട്.