ഹരിപ്പാട്: കൊവിഡ്-19 ഭീതിയെ തുടര്‍ന്ന് സൈക്കിളില്‍ നാട്ടിലേക്ക് പോകാനുള്ള അതിഥി തൊഴിലാളികളുടെ ശ്രമം പൊലിസ് തടഞ്ഞു. പിന്നീട് കാര്യങ്ങള്‍ പറഞ്ഞു മനസിലാക്കി തിരിച്ചയച്ചു. ചെന്നിത്തല പടിഞ്ഞാറ് താമസിക്കുന്ന ബിഹാര്‍ സ്വദേശികളായ 19 പേരാണ് കഴിഞ്ഞ ദിവസം അവരുടെ സൈക്കിളില്‍ നാട്ടിലേക്ക് തിരിച്ചത്.

കഴിഞ്ഞ ആഴ്ച നാട്ടിലേക്ക് പോകാനായി ഹരിപ്പാട് റയില്‍വേ സ്‌റ്റേഷനിലെത്തിയിരുന്നു. അപ്പോഴാണ് ട്രെയിനുകള്‍ ഓടുന്നില്ലെന്ന വിവരം അറിഞ്ഞത്. ഇവരുടെ കൂടെ താമസിച്ചിരുന്ന കുറച്ചു പേര്‍ രണ്ടാഴ്ച മുന്‍പ് നാട്ടിലേക്ക് പോയിരുന്നു. എങ്ങനേയും കേരളത്തില്‍നിന്ന് രക്ഷപ്പെട്ട് നാട്ടിലെത്തണമെന്ന് വീട്ടുകാര്‍ ആവശ്യപ്പെട്ടതിനെ തുടര്‍ന്നാണ് സൈക്കിളില്‍ പോകാന്‍ തീരുമാനിച്ചതെന്ന് ഇവര്‍ പറഞ്ഞു. കരുവാറ്റയില്‍ വച്ചാണ് പൊലിസ് ഇവരെ തടഞ്ഞത്. ഇവര്‍ക്ക് താമസ സൗകര്യം നല്‍കിയിരുന്ന ആളെ ഫോണില്‍ ബന്ധപ്പെട്ടതിനെ തുടര്‍ന്ന് തിരികെ എത്തിക്കുകയായിരുന്നു.