തിരുവനന്തപുരം: കെ.എസ്.ആര്‍.ടി.സി അത്യാധുനിക സൗകര്യങ്ങളോടെയുള്ള ഇലക്ട്രിക് ബസ് സര്‍വിസ് ആരംഭിക്കുന്നു. പരീക്ഷണാടിസ്ഥാനത്തില്‍ തിരുവനന്തപുരം നഗരത്തില്‍ ഈ മാസം 18 മുതല്‍ സര്‍വിസ് ആരംഭിക്കാനാണ് തീരുമാനം. 15 ദിവസത്തേക്കായി പരീക്ഷണാടിസ്ഥാനത്തിലാണ് തലസ്ഥാന നഗരിയില്‍ സര്‍വിസ് നടത്തുന്നത്.
കര്‍ണാടക, ആന്ധ്ര, ഹിമാചല്‍പ്രദേശ്, മഹാരാഷ്ട്ര, തെലങ്കാന എന്നിവിടങ്ങളില്‍ സര്‍വിസ് നടത്തുന്ന ഗോള്‍ഡ് സ്റ്റോണ്‍ ഇന്‍ഫ്രാടെക് ലിമിറ്റഡ് എന്ന കമ്പനിയാണ് തലസ്ഥാനത്തും പരീക്ഷണ സര്‍വിസ് നടത്തുന്നത്. 40 പുഷ് ബാക്ക് സീറ്റുകളോടു കൂടിയ ബസില്‍ സി.സി ടി.വി കാമറ, ജി.പി.എസ്, വിനോദ സംവിധാനങ്ങളും ഉണ്ട്. ഒരു ചാര്‍ജിങ്ങില്‍ 150 കിലോമീറ്റര്‍ വരെ ഓടാവുന്ന ബസുകളാണു സര്‍വിസ് നടത്തുക.
കിലോമീറ്റര്‍ നിരക്കില്‍ വാടകയും വൈദ്യുതിയും കണ്ടക്ടറെയും കെ.എസ്.ആര്‍.ടി.സി നല്‍കും.