കാഞ്ഞങ്ങാട്: കെ.എസ്.ആര്‍.ടി.സി ബസ് ബൈക്കിലിടിച്ച് രണ്ട് യുവാക്കള്‍ തല്‍ക്ഷണം മരിച്ചു.
രാവണേശ്വരം പള്ളത്തിങ്കാല്‍ മുക്കൂട് സ്വദേശികളായ ബൈജു(27) , സുരേഷ് (29)എന്നിവരാണ് മരിച്ചത്.
കാഞ്ഞങ്ങാട് നിന്ന് കട്ടപ്പനയിലേക്ക് പോവുകയായിരുന്ന ബസാണ് അപകടം വരുത്തിയത്. ഇന്നലെ രാത്രി 7.30 ഓടെ കാഞ്ഞങ്ങാട് മാതോത്ത് അമ്പലത്തിനടുത്താണ് സംഭവം. നീലേശ്വരം മന്ദംപുറം കാവിലെ കലശോത്സവത്തില്‍ സംബന്ധിച്ച് തിരികെ കാഞ്ഞങ്ങാട് ഭാഗത്തേക്ക് വരുകയായിരുന്ന ഇരുവരും സഞ്ചരിച്ച ബൈക്കില്‍ ബസ് ഇടിക്കുകയായിരുന്നു. ഇടിയുടെ ആഘാതത്തില്‍ റോഡിലേക്ക് തെറിച്ച് വീണ ഇവരുടെ ദേഹത്ത് ബസ് കയറി ഇറങ്ങുകയും ചെയ്തു. ഹൊസ്ദുര്‍ഗ് പൊലിസ് ഇന്‍ക്വസ്റ്റ് നടത്തിയ ശേഷം മൃതദേഹങ്ങള്‍ കാഞ്ഞങ്ങാട് ജില്ലാ ആശുപത്രി മോര്‍ച്ചറിയിലേക്ക് മാറ്റി. വാഴക്കോടന്‍ വളപ്പില്‍ ലക്ഷ്മിയുടെ മകനാണ് സുരേഷ്. സഹോദരന്‍: രാജേഷ്. വടക്കേ വളപ്പില്‍ ശാരദയുടെ മകനാണ് മരിച്ച ബൈജു.