തിരുവനന്തപുരം: നിയമസഭാ തെരഞ്ഞെടുപ്പ് തോല്‍വിയില്‍ സംസ്ഥാനത്തെ ഉന്നത നേതൃത്വം ഉത്തരവാദിത്വം ഏറ്റെടുക്കണമെന്ന് സി.പി.എം സംസ്ഥാന നേതൃത്വത്തിന് മുന്നറിയിപ്പു നല്‍കുന്ന കേന്ദ്ര കമ്മിറ്റിയുടെ അവലോകന റിപ്പോര്‍ട്ട് പുറത്ത്. 

കേന്ദ്ര കമ്മിറ്റി റിപ്പോര്‍ട്ടില്‍ ഉന്നത നേതൃത്വം ഉത്തരവാദിത്വം ഏല്‍ക്കണമെന്ന് നിര്‍ദേശിച്ചത് സംസ്ഥാന സെക്രട്ടറിക്കും പിണറായി വിജയനും പി.ബിയില്‍ സ്വാധീനം കുറയുന്നുവെന്നതിന് തെളിവായി വിലയിരുത്തപ്പെടുന്നു. ശബരിമല സ്വര്‍ണക്കൊള്ള കേസില്‍ ഉള്‍പ്പെട്ട എ. പദ്മകുമാറിനെതിരേ നടപടിയെടുക്കാനുള്ള കേന്ദ്രകമ്മിറ്റി നിര്‍ദേശം സംസ്ഥാന നേതൃത്വം അനുസരിച്ചില്ലെന്നും പത്മകുമാര്‍ ജയിലിലാണെന്ന കാരണം പറഞ്ഞ് നടപടി നീട്ടിവച്ചത് തിരിച്ചടിയായെന്നും റിപ്പോര്‍ട്ടില്‍ പറയുന്നു. ജില്ലാ കമ്മിറ്റികള്‍ക്ക് പാളിച്ച പറ്റിയെന്ന് ചൂണ്ടിക്കാട്ടി ഒഴിയാനാകില്ലെന്ന ശക്തമായ മുന്നറിയിപ്പാണ് റിപ്പോര്‍ട്ട് നല്‍കുന്നത്. തെരഞ്ഞെടുപ്പിലെ വീഴ്ചകള്‍ സമയത്ത് പരിഹരിക്കുന്നതില്‍ ഉന്നത നേതൃത്വം പരാജയപ്പെട്ടു. സ്ഥാനാര്‍ഥി നിര്‍ണയം അടക്കം വിഷയങ്ങളിലെ വീഴ്ചയുടെ ഉത്തരവാദിത്വം ഉന്നത നേതൃത്വം ഏറ്റെടുക്കണമെന്നും സി.സി റിപ്പോര്‍ട്ടില്‍ വ്യക്തമായി രേഖപ്പെടുത്തുന്നു. 

യോഗി ആദിത്യനാഥിന്റെ പ്രസ്താവന അയ്യപ്പ സംഗമത്തില്‍ വായിച്ചത് പാര്‍ട്ടി നയങ്ങള്‍ക്ക് എതിരായ നടപടിയായി. കേരളത്തില്‍ രാഷ്ട്രീയ പ്രചാരണം ഫലപ്രദമായി നടത്തുന്നതില്‍ നേതൃത്വം പരാജയപ്പെട്ടു. സി.പി.എംബി.ജെ.പി ഡീലെന്ന മുസ്‌ലിം ലീഗിന്റെയും ജമാ അത്തെ ഇസ്്‌ലാമിയുടെയും പ്രചാരണം ചെറുക്കാനായില്ല. തളിപ്പറമ്പിലും പയ്യന്നൂരിലും സ്ഥാനാര്‍ഥി നിര്‍ണയം പാളി. ബന്ധുക്കള്‍ക്ക് സീറ്റ് നല്‍കുന്നു എന്ന വാദം തിരിച്ചടിയായെന്നും റിപ്പോര്‍ട്ടില്‍ പറയുന്നു. 

പി.എം ശ്രീ വിഷയത്തില്‍ ഉണ്ടായത് ഒഴിവാക്കേണ്ട വിവാദമാണ്. കൂട്ടായ ചര്‍ച്ചയുടെ അഭാവമാണ് ഇതിലേക്ക് നയിച്ചതെന്ന് റിപ്പോര്‍ട്ട് ചൂണ്ടിക്കാട്ടുന്നു. നേരത്തെ, എം.വി ഗോവിന്ദന്‍ തിരുത്തിയില്ലെന്ന് എം.എ ബേബി  സൂചിപ്പിച്ചത് സംസ്ഥാന നേതൃത്വം തള്ളിയിരുന്നു.