ന്യൂഡല്‍ഹി: ജന്തര്‍ മന്തറിലെ പ്രതിഷേധത്തിനുനേരെയുണ്ടായ പൊലിസ് അതിക്രമത്തിനിടെ പെല്ലറ്റ് ഗണ്‍ ഉപയോഗിച്ചതായി ആരോപണം. സമരത്തില്‍ പങ്കെടുത്ത ഗുരുഗ്രാം സ്വദേശി ഷെയ്ഖ് ഇര്‍ഷാദ് മന്‍സൂരിയുടെ ശരീരത്തില്‍നിന്ന് പെല്ലറ്റ് നീക്കംചെയ്യാന്‍ മൂന്ന് ശസ്ത്രക്രിയകള്‍ നടത്തിയതായ റിപ്പോര്‍ട്ട് പുറത്തുവന്നതോടെയാണ്, സമരക്കാരെ നേരിടാന്‍ വിവാദമായ പെല്ലറ്റ് ഗണ്‍ പോലുള്ള മാരക ആയുധങ്ങള്‍ ഉപയോഗിച്ചതായ പരാതി ഉയര്‍ന്നത്.
മുഖത്തും കഴുത്തിലും പെല്ലറ്റ് പോലെയുള്ള ചെറു ലോഹക്കഷ്ണങ്ങള്‍ തറച്ചുകയറിയതായി ആശുപത്രി ചികിത്സയ്ക്കുശേഷം വ്യക്തമായെന്നാണ് റിപ്പോര്‍ട്ടുകള്‍. ചൊവ്വാഴ്ച മൂന്ന് മണിക്കൂര്‍ നീണ്ട ശസ്ത്രക്രിയയിലൂടെയാണ് ഇവ നീക്കംചെയ്തത്. കണ്ണിന് താഴെയും തൊണ്ടയിലുമുണ്ടായ ഗുരുതര പരുക്കുകള്‍ കാഴ്ചശക്തിയെ വരെ ബാധിച്ചേക്കാമെന്ന് ഡോക്ടര്‍മാര്‍ അറിയിച്ചതായി ഇര്‍ഷാദിന്റെ സുഹൃത്ത് പറഞ്ഞു.

ALSO READ: സമരം തണുപ്പിക്കാനുള്ള നീക്കവുമായി മോദി; ഫാസ്റ്റ് ട്രാക്ക് കോടതികള്‍ സ്ഥാപിക്കുമെന്ന് പ്രഖ്യാപനം; ധര്‍മേന്ദ്ര പ്രധാന്റെ രാജിയില്‍ കുറഞ്ഞൊന്നുമില്ലെന്ന് ആവര്‍ത്തിച്ച് രാഹുലും സി.ജെ.പിയും

സംഭവസമയത്ത് ഇരുവരും പാര്‍ലമെന്റ് സ്ട്രീറ്റിന് സമീപത്തെ കൊണാട്ട് പ്ലേസ് ഭാഗത്തായിരുന്നുവെന്നും 40 മുതല്‍ 50 മീറ്റര്‍ അകലെയുണ്ടായിരുന്ന ദ്രുത കര്‍മ സേന (ആര്‍.എ.എഫ്) ഉദ്യോഗസ്ഥന്റെ ഭാഗത്തുനിന്നാണ് ഇത് പതിച്ചതെന്നും സുഹൃത്ത് പറഞ്ഞു. മറ്റ് സമരക്കാര്‍ക്കും സമാനമായ ആയുധങ്ങള്‍ ഉപയോഗിച്ചോയെന്നത് വ്യക്തമല്ലെങ്കിലും ഈ പരുക്ക് പെല്ലറ്റ് ഗണ്ണോ സമാന ആയുധമോ ഉപയോഗിച്ചെന്ന ആരോപണങ്ങള്‍ക്ക് ശക്തി പകരുന്നതായി പ്രതിഷേധക്കാര്‍ ചൂണ്ടിക്കാട്ടുന്നു.

ആശുപത്രിയില്‍ കഴിയുന്ന ഇര്‍ഷാദിനെ കേന്ദ്ര ആരോഗ്യമന്ത്രി ജെ.പി നദ്ദ സന്ദര്‍ശിച്ചിരുന്നു. അതേസമയം, പ്രതിഷേധക്കാരെ നേരിടാന്‍ പെല്ലറ്റ് ഗണ്ണോ സമാന ആയുധങ്ങളോ ഉപയോഗിച്ചില്ലെന്നാണ് ഡല്‍ഹി പൊലിസ് പറയുന്നത്. 

reports claim a protester underwent multiple surgeries to remove pellet-like metal fragments after police action at jantar mantar. delhi police deny using pellet guns or similar weapons during the protest.