തിരുവനന്തപുരം: രാത്രികാലങ്ങളില്‍ ഓട്ടോയുമായി കറങ്ങിനടന്ന് യാത്രക്കാരില്‍നിന്നു പണവും മൊബൈലും പിടിച്ചുപറിക്കുന്ന വിരുതനെ മെഡിക്കല്‍കോളജ് പൊലിസ് പിടികൂടി. വാമനപുരം ആനച്ചാല്‍ കിഴക്കുവിള വീട്ടില്‍ അനില്‍കുമാര്‍ (39) ആണ് പിടിയിലായത്.
വഴുതക്കാട് സിന്‍ഡിക്കറ്റ് ബാങ്കിലെ സീനിയര്‍ മാനേജര്‍ സുന്ദരേശന്റെ പണമാണ് ഇയാള്‍ പിടിച്ചുപറിച്ചത്. കഴിഞ്ഞദിവസം ഡ്യൂട്ടികഴിഞ്ഞിറങ്ങിയ അനില്‍കുമാര്‍ രാത്രി ഒമ്പതുമണിയോടെ ആക്കുളം ചെറുവയ്ക്കല്‍ വില്ലേജ് ഓഫിസിന് സമീപത്തുനിന്നും ഇയാളുടെ ഓട്ടോ പിടിച്ചു. ഇടിയടിക്കോട് ദേവീക്ഷേത്രത്തിനു സമീപം ആളില്ലാത്ത സ്ഥലത്തെത്തിയപ്പോള്‍ ഓട്ടോ നിര്‍ത്തിയ ഡ്രൈവര്‍ അവിടെ ഇറങ്ങാന്‍ ആവശ്യപ്പെട്ടു. രാത്രി ആയതുകൊണ്ട് ഒറ്റയ്ക്കു പോകാന്‍ ബുദ്ധിമുട്ടാണെന്നും വീട്ടില്‍ കൊണ്ടുവിടാന്‍ ആവശ്യപ്പെട്ടുവെങ്കിലും ഡ്രൈവര്‍ യാത്രക്കാരനെ പിടിച്ചുപുറത്തിറക്കുകയും 150 രൂപ ആവശ്യപ്പെടുകയും ചെയ്തു. രൂപ എടുക്കാനായി പോക്കറ്റില്‍ നിന്നും പേഴ്‌സ് എടുക്കവെ പഴ്‌സ് പിടിച്ചുപറിച്ച് ഉള്ളൂര്‍ ഭാഗത്തേക്ക് വണ്ടി ഓടിച്ചു പോകുകയായിരുന്നു. ഓട്ടോയുടെ നമ്പര്‍ മനസ്സിലാക്കിയ അനില്‍കുമാര്‍ വിവരം കണ്‍ട്രോള്‍ റൂമിലും മെഡിക്കല്‍ കോളജ് പൊലിസിലും വിളിച്ചറിയിച്ചു. പൊലിസ് ഉടന്‍ ഓട്ടോയുടെ നമ്പര്‍ പിന്തുണര്‍ന്ന് പ്രതിയെ പിടികൂടുകയായിരുന്നു.