ലക്‌നൗ: മോദിയുടെ ദീപം തെളിയിക്കല്‍ പരിപാടിക്കിടെ ബി.ജെ.പി നേതാവ് പുറത്തിറങ്ങി ആകാശത്തേക്ക് വെടിവച്ചു.
ഉത്തര്‍പ്രദേശിലെ ബാല്‍റാംപൂര്‍ ജില്ലയില്‍ ബി.ജെ.പി മഹിളാ മോര്‍ച്ച ജില്ലാ അധ്യക്ഷ മഞ്ജു തിവാരിയാണ് വെളിയിലിറങ്ങി വെടിയുതിര്‍ത്തത്. ഇവര്‍ തന്നെ ഇത് സമൂഹ മാധ്യമങ്ങളില്‍ പങ്കുവെക്കുകയും ചെയ്തു.
വീട്ടില്‍ വിളക്ക് കത്തിച്ച മഹിളാ മോര്‍ച്ച പ്രസിഡന്റ് പിന്നീട് റിവോള്‍വറെടുത്ത് പുറത്തേക്കിറങ്ങുകയായിരുന്നു. റിവോള്‍വര്‍ ഉപയോഗിച്ച് മഞ്ജു തിവാരി വെടിയുതിര്‍ക്കുന്നത് വിഡിയോയില്‍ വ്യക്തമാണ്.ഭര്‍ത്താവ് ഓം പ്രകാശാണ് രംഗം പകര്‍ത്തിയത്. ദൃശ്യം വൈറലായതോടെ പ്രതിപക്ഷം സംഭവം വിവാദമാക്കി.തുടര്‍ന്ന് പൊലിസ് ഇവര്‍ക്കെതിരേ കേസെടുത്തതോടെ ക്ഷമാപണവുമായി നേതാവ് രംഗത്തെത്തി.