കയ്പമംഗലം : നിയന്ത്രണം വിട്ട മല്‍സ്യബന്ധന ബോട്ട് കരയിലേക്ക് ഇടിച്ച് കയറി. ചാമക്കാല ബീച്ചിലാണ് മത്സ്യബന്ധന ബോട്ട് മണല്‍ തിട്ടയില്‍ ഇടിച്ച് കയറിയത്.
ബോട്ടിന്റെ സ്രാങ്ക് ഉറങ്ങിപ്പോയത് കാരണം. ഇന്നലെ പുലര്‍ച്ചെയാണ് സംഭവം.മത്സ്യബന്ധനത്തിനായി മുനമ്പത്ത് നിന്നുമാണ് വടക്ക് ദിശ ലക്ഷ്യമാക്കി പന്ത്രണ്ട് പേരടങ്ങുന്ന സംഘം യാത്ര തിരിച്ചത്.
ഉറങ്ങിപ്പോയതിനാല്‍ സ്റ്റിയറിങ്ങിന്റെ നിയന്ത്രണം നഷ്ടപ്പെട്ട ബോട്ട് തീരത്തേക്ക് പാഞ്ഞടുക്കുകയായിരുന്നു. സാധാരണ ഗതിയില്‍ ചെറിയ വള്ളങ്ങളില്‍ മല്‍സ്യതൊഴിലാളികള്‍ തീരത്തോട് ചേര്‍ന്ന് മീന്‍ പിടിക്കുന്ന സമയമാണ്. അപകട സമയം ചെറുവള്ളങ്ങള്‍ ഒന്നും സമീപത്ത് ഇല്ലാതിരുന്നത് വന്‍ ദുരന്തമാണ് ഒഴിവാക്കിയത്.
ഉച്ചയോടെ മുനമ്പത്ത് നിന്നും നാല് ബോട്ടുകള്‍ എത്തി വടം ഉപയോഗിച്ച് മണിക്കൂറുകള്‍ നീണ്ട പരിശ്രമത്തിന് ഒടുവിലാണ് ബോട്ട് കരയില്‍ നിന്നും കൊണ്ടുപോകാനായത്.
കൂറ്റന്‍ ബോട്ട് തീരത്ത് അടിഞ്ഞ വാര്‍ത്തയറിഞ് സ്‌കൂള്‍ വിദ്യാര്‍ഥികള്‍ ഉള്‍പ്പെടെ നൂറ് കണക്കിന് പേരാണ് രാവിലെ മുതല്‍ തീരത്ത് എത്തിയത്.