ന്യൂഡല്‍ഹി: ലോക്ക്ഡൗണ്‍ കാരണം വിമാന സര്‍വിസുകള്‍ റദ്ദാക്കിയതോടെ യാത്ര മുടങ്ങിപ്പോയവരുടെ ടിക്കറ്റ് തുക വിമാനക്കമ്പനികള്‍ പൂര്‍ണമായും തിരികെ നല്‍കും. അന്താരാഷ്ട്ര യാത്രയ്ക്കുള്ള ടിക്കറ്റുകള്‍ ഉള്‍പ്പടെ എല്ലാ ടിക്കറ്റുകള്‍ക്കും തുക തിരികെ ലഭിക്കും. സര്‍വിസ് ചാര്‍ജ്ജുകളോ കാന്‍സലേഷന്‍ ചാര്‍ജ്ജുകളോ ഈടാക്കാതെയായിരിക്കും തുക നല്‍കുക. മാര്‍ച്ച് 25 മുതല്‍ ഏപ്രില്‍ മൂന്ന് വരെയുള്ള തിയതികള്‍ക്കുള്ളില്‍ യാത്ര ചെയ്യാന്‍ ടിക്കറ്റെടുത്തവരുടെ പണമാണ് പൂര്‍ണമായും തിരികെ ലഭിക്കുക. ടിക്കറ്റ് തുക തിരികെ നല്‍കില്ലെന്നും എന്നാല്‍ മറ്റൊരു ദിവസത്തേക്ക് യാത്രാ തിയതി മാറ്റാമെന്നുമായിരുന്നു എയര്‍ലൈന്‍ കമ്പനികളുടെ ആദ്യ നിലപാട്. ഇത്തരത്തില്‍ മാറ്റുമ്പോള്‍ ടിക്കറ്റ് നിരക്കില്‍ വരുന്ന അധികതുക യാത്രക്കാരന്‍ നല്‍കണം. ഇതിനെതിരേ വ്യാപക പരാതിയുണ്ടായതിനെത്തുടര്‍ന്ന് തുക തിരികെ നല്‍കാന്‍ ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍ വിമാനക്കമ്പനികള്‍ക്ക് നിര്‍ദ്ദേശം നല്‍കുകയായിരുന്നു.