ഗസ്സ: അതിര്‍ത്തിയില്‍ ഫലസ്തീനികള്‍ക്കുനേരെ ഇസ്‌റാഈല്‍ അതിക്രമം തുടരുന്നു. കഴിഞ്ഞ ദിവസം ഗസ്സ അതിര്‍ത്തിയില്‍ ഇസ്‌റാഈല്‍ സൈന്യം നടത്തിയ വെടിവയ്പ്പില്‍ നാല് ഫലസ്തീനികള്‍ കൊല്ലപ്പെട്ടു. നൂറുകണക്കിനാളുകള്‍ക്കു പരുക്കേല്‍ക്കുകയും ചെയ്തിട്ടുണ്ട്.
ഇസ്‌റാഈല്‍ അതിക്രമങ്ങള്‍ക്കെതിരേ അതിര്‍ത്തിയില്‍ പ്രതിഷേധിച്ച നാട്ടുകാര്‍ക്കെതിരേയായിരുന്നു സൈന്യത്തിന്റെ നരനായാട്ട്. പ്രക്ഷോഭകാരികളില്‍ ഭൂരിഭാഗം പേരും വൈകിട്ട് നോമ്പുതുറക്കായി വീടുകളിലേക്കു മടങ്ങിയ നേരത്തായിരുന്നു ഇസ്‌റാഈല്‍ ആക്രമണം. കൊല്ലപ്പെട്ടവരില്‍ 15കാരനും ഉള്‍പ്പെടും. 620 പേര്‍ക്കാണു പരുക്കേറ്റത്. ഇതില്‍ 120 പേര്‍ക്കും വെടിയേല്‍ക്കുകയായിരുന്നു. അതേസമയം, തങ്ങള്‍ക്കെതിരേ കല്ലെറിയുകയും ടയര്‍ കത്തിക്കുകയും ചെയ്തവര്‍ക്കെതിരേ പ്രതിരോധത്തിന്റെ ഭാഗമായി നടപടി സ്വീകരിക്കുക മാത്രമാണ് ചെയ്തതെന്ന് ഇസ്‌റാഈല്‍ സൈന്യം അവകാശപ്പെട്ടു. ഒരിടത്ത് രണ്ട് ഫലസ്തീനികള്‍ തങ്ങള്‍ക്കെതിരേ വെടിയുതിര്‍ത്തതായും ചിലര്‍ ഗ്രനേഡ് എറിഞ്ഞതായും സൈന്യം ആരോപിച്ചു.