കിഴിശ്ശേരി: ശക്തമായ കാറ്റിലും മഴയിലും വിളയില്‍ പാണാട്ട്, പറപ്പൂര്‍ ഭാഗങ്ങളില്‍ മരം ഒടിഞ്ഞു വീണു. ശനിയാഴ്ച ഉച്ചയോടെ ഉണ്ടായ ശക്തമായ കാറ്റില്‍ റോഡിലേക്ക് മരം വീണ് ഗതാഗത തടസവും നേരിട്ടു. വിളയില്‍ പാണാട്ട് സ്‌കൂളിന് സമീപം റോഡില്‍ മരം ഒടിഞ്ഞ് വീണ് വൈദ്യുതിത്തൂണ്‍ തകര്‍ന്നു. മണിക്കൂറുകളോളം ഗതാഗത തടസം നേരിട്ടു.
നാട്ടുകാര്‍ ചേര്‍ന്ന് മരം മുറിച്ച് മാറ്റിയതിനു ശേഷമാണ് ഗതാഗതം പുനഃസ്ഥാപിച്ചത്. വൈദ്യുതി പോസ്റ്റ് ഒടിഞ്ഞ് മണിക്കൂറുകള്‍ പിന്നിട്ടിട്ടും കെ.എസ്.ഇ.ബി ഓഫിസില്‍നിന്ന് ആരും വരാത്തത് പരാതിക്കിടയാക്കി. പ്രദേശത്ത് ശനിയാഴ്ച പോയ വൈദ്യുതി ഇന്നലെ നാലോടെയാണ് വന്നത്.