ഭോപ്പാല്‍: ആരോഗ്യപ്രവര്‍ത്തകരെ ആക്രമിക്കുന്നവര്‍ക്കെതിരേ ശക്തമായ നടപടികള്‍ പ്രഖ്യാപിച്ച് കേന്ദ്രസര്‍ക്കാര്‍ രംഗത്തെത്തിയതിനു പിന്നാലെ മധ്യപ്രദേശില്‍ ഡോക്ടര്‍ക്കും പൊലിസുകാരനും നേരെ ആക്രമണം. ഗസ്‌വാനി വില്ലേജിലാണ് സംഭവം. രോഗിയുമായി സമ്പര്‍ക്കം പുലര്‍ത്തിയവരെ പരിശോധിക്കാനെത്തിയ സര്‍ക്കാര്‍ ആശുപത്രിയിലെ ഡോ. പവന്‍ ഉപാധ്യായയെ വീട്ടുകാരുടെ നേതൃത്വത്തില്‍ ജനക്കൂട്ടം കൈയേറ്റം ചെയ്യുകയായിരുന്നു. തടയാനെത്തിയ പൊലിസുകാരനെയും ആക്രമിച്ചു. അസി. സബ് ഇന്‍സ്‌പെക്ടര്‍ ശ്രീറാം അവാസ്തിക്കാണ് പരുക്കേറ്റത്. സംഭവത്തില്‍ രണ്ടുപേരെ പൊലിസ് അറസ്റ്റ് ചെയ്തിട്ടുണ്ട്. എന്നാല്‍, പരിശോധിക്കപ്പെടേണ്ടിയിരുന്നയാള്‍ മുങ്ങിയിരിക്കുകയാണ്.