ന്യൂഡല്‍ഹി: സോണിയാഗാന്ധിക്കെതിരേ അപകീര്‍ത്തിപരമായ പരാമര്‍ശം നടത്തുകയും മതസ്പര്‍ദയുണ്ടാക്കാന്‍ ശ്രമിക്കുകയും ചെയ്തതിന് അര്‍ണബ് ഗോസ്വാമിക്കെതിരേ വിവിധ സംസ്ഥാനങ്ങളില്‍ രജിസ്റ്റര്‍ ചെയ്ത കേസുകളില്‍ മൂന്നാഴ്ചത്തേക്ക് അറസ്റ്റ് പോലുള്ള നടപടികള്‍ പാടില്ലെന്ന് സുപ്രിംകോടതി. 

ഈ കാലത്തിനുള്ളില്‍ ഹൈക്കോടതിയില്‍ മുന്‍കൂര്‍ ജാമ്യാപേക്ഷ നല്‍കാനും ജസ്റ്റിസുമാരായ ഡി.വൈ ചന്ദ്രചൂഡ്, എം.ആര്‍ ഷാ എന്നിവരടങ്ങിയ ബെഞ്ച് അനുമതി നല്‍കി. അതോടൊപ്പം നാഗ്പൂരില്‍ രജിസ്റ്റര്‍ ചെയ്ത എഫ്.ഐ.ആര്‍ ഒഴികെയുള്ള എല്ലാ എഫ്.ഐ.ആറുകളും സുപ്രിംകോടതി സ്റ്റേ ചെയ്തു. നാഗ്പൂരില്‍ രജിസ്റ്റര്‍ ചെയ്ത എഫ്.ഐ.ആര്‍ മുംബൈയിലേക്ക് മാറ്റാനും ഉത്തരവിട്ടു. ആക്രമണത്തിനിരയായെന്ന അര്‍ണബിന്റെ പരാതിയില്‍ രജിസ്റ്റര്‍ ചെയ്ത കേസിനൊപ്പമായിരിക്കണം ഈ എഫ്.ഐ.ആറിലും അന്വേഷണം നടക്കേണ്ടതെന്ന് കോടതി നിര്‍ദേശിച്ചു. കേസില്‍ ബന്ധപ്പെട്ട കക്ഷികള്‍ക്ക് സുപ്രിംകോടതി നോട്ടിസയച്ചു. 

ഏപ്രില്‍ 21ന് പല്‍ഗാര്‍ ആള്‍ക്കൂട്ടക്കൊലയുമായി ബന്ധപ്പെട്ട ടെലിവിഷന്‍ ചര്‍ച്ചയ്ക്കിടെ സോണിയാഗാന്ധിക്കെതിരേ അര്‍ണബ് മോശം പരാമര്‍ശങ്ങള്‍ നടത്തുകയും മതസ്പര്‍ദയുണ്ടാക്കാന്‍ ശ്രമിക്കുകയും ചെയ്തുവെന്നാണ് കേസ്. മഹാരാഷ്ട്ര, ഛത്തീസ്ഗഡ്, പഞ്ചാബ്, രാജസ്ഥാന്‍, തെലങ്കാന, ജമ്മുകശ്മിര്‍ സംസ്ഥാനങ്ങളിലായാണ് കേസ് രജിസ്റ്റര്‍ ചെയ്തത്. ഇതിനെതിരേ അര്‍ണബ് സുപ്രിംകോടതിയെ സമീപിക്കുകയായിരുന്നു. വാദത്തിനിടെ അര്‍ണബ് മതസ്പര്‍ദയുണ്ടാക്കുന്ന പരാമര്‍ശങ്ങള്‍ നടത്തിയിട്ടില്ലെന്ന് അര്‍ണബിന്റെ അഭിഭാഷകന്‍ മുകുള്‍ രോഹ്തകി വാദിച്ചു. കൊല്ലപ്പെട്ട സന്യാസികളുടെ കാര്യത്തില്‍ സോണിയാഗാന്ധിയുടെ നിശബ്ദത ചോദ്യം ചെയ്യുകയായിരുന്നുവെന്നും അദ്ദേഹം വാദിച്ചു. ഹിന്ദുക്കളെ മുസ്‌ലിംകള്‍ക്കെതിരേ തിരിച്ചുവിടാനുള്ള മനഃപൂര്‍വമായ ശ്രമമാണ് അര്‍ണബ് നടത്തിയതെന്ന് മഹാരാഷ്ട്ര സര്‍ക്കാരിന് വേണ്ടി ഹാജരായ കപില്‍ സിബല്‍ വാദിച്ചു. 

ഭരണഘടനയുടെ 32ാം വകുപ്പിന്റെ അടിസ്ഥാനത്തിലുള്ള അഭിപ്രായ സ്വാതന്ത്ര്യത്തിന്റെ പരിധിയില്‍ ഈ കുറ്റം വരില്ല. പരാതി ലഭിച്ചാല്‍ പോലിസ് അന്വേഷണം നടത്താതെ എഫ്.ഐ.ആര്‍ റദ്ദാക്കാന്‍ കഴിയില്ല. വിവിധ സംസ്ഥാനങ്ങളിലെ കേസുകള്‍ ഒന്നാക്കാം. എന്നാല്‍, റദ്ദാക്കാനാവില്ലെന്നും സിബല്‍ വാദിച്ചു.