കൊച്ചി: മലപ്പുറം ലോക്‌സഭ ഉപതെരഞ്ഞെടുപ്പില്‍ ആരെ പിന്തുണയ്ക്കണമെന്നകാര്യത്തില്‍ ഒന്‍പതിന് തീരുമാനം എടുക്കുമെന്നും എന്നാല്‍ പ്രചാരണത്തിനുണ്ടാകില്ലെന്നും വെല്‍ഫെയര്‍ പാര്‍ട്ടി സംസ്ഥാന നേതാക്കള്‍ വാര്‍ത്താ സമ്മേളനത്തില്‍ പറഞ്ഞു. സംഘ്പരിവാര്‍ സമഗ്രാധിപത്യത്തിനെതിരേ വെല്‍ഫെയര്‍ പാര്‍ട്ടി ഓഫ് ഇന്ത്യ നടത്തുന്ന ദേശീയ പ്രക്ഷോഭയാത്രയ്ക്ക് എറണാകുളത്ത് സ്വീകരണം നല്‍കും. ആറിന് കലൂര്‍ സ്റ്റേഡിയത്തിലാണ് സ്വീകരണം നല്‍കുക. ഏപ്രില്‍ ഒന്നിന് രാജസ്ഥാനിലെ കോട്ടയില്‍ നിന്നാരംഭിച്ച യാത്രയ്ക്ക് ദേശീയ പ്രസിഡന്റ് എസ്.ക്യൂ.ആര്‍ ഇല്യാസാണ് നേതൃത്വം നല്‍കുന്നത്. ഏഴിന് തിരുവനന്തപുരത്ത് കേരളത്തിലെ ജനകീയ സമരങ്ങളുടെയും സാമൂഹിക പ്രസ്ഥാനങ്ങളുടേയും ഒത്തുചേരലും എട്ടിന് കണ്ണൂരില്‍ ഭരണകൂട ഭീകരതയുടെ ഇരകളുടെ ഒത്തുചേരലും സംഘടിപ്പിക്കും.
വാര്‍ത്താ സമ്മേളനത്തില്‍ സംസ്ഥാന എക്‌സിക്യൂട്ടീവ് അംഗം സജീദ് ഖാലിദ്, സംസ്ഥാന വര്‍ക്കിങ് കമ്മിറ്റി അംഗം ജോണ്‍ അമ്പാട്ട് തുടങ്ങിയവര്‍ പങ്കെടുത്തു.