മട്ടാഞ്ചേരി: പാണ്ടണ്ടിക്കുടിയിലെ ജവഹര്‍ റോഡില്‍ പുതിയതായി ആരംഭിച്ച കണ്‍സ്യൂമര്‍ ഫെഡിന്റെ ചില്ലറ മദ്യ വില്‍പ്പനശാല അടച്ച് പൂട്ടണമെന്ന് കേരള മദ്യനിരോധന സമിതി കൊച്ചി താലൂക്ക് കമ്മിറ്റി ആവശ്യപ്പെട്ടു. മുനിസിപ്പല്‍ നിയമ പ്രകാരം റസിഡന്‍ഷ്യല്‍ ബില്‍ഡിങില്‍ വ്യാപാര സ്ഥാപനങ്ങള്‍ പ്രവര്‍ത്തിക്കുന്നത് നിയമ വിരുദ്ധമാണെന്ന് അറിഞ്ഞിട്ടും നഗരസഭ ഹൈക്കോടതിയില്‍ വസ്തുതകള്‍ വിവരിച്ച് സത്യാവാങ്മൂലം നല്‍കാതിരുന്നത് ഖേദകരമാണെന്നും ചിലര്‍ വഴി ഉദ്യോഗസ്ഥര്‍ക്ക് പണം നല്‍കി കൊമേഴ്‌സ്യല്‍ ബില്‍ഡിങ് ആക്കാനുള്ള ശ്രമം നടന്നു വരികയാണെന്നും സമിതി കുറ്റപ്പെടുത്തി. മദ്യശാല പൂട്ടി സീല്‍ ചെയ്യാന്‍ ഹെല്‍ത്ത് ഇന്‍സ്‌പെക്ടര്‍ക്ക് ഉത്തരവ് നല്‍കിയിട്ടും ഇത് കീഴ് ഉദ്യോഗസ്ഥന് നല്‍കി മുങ്ങിയതും വീട് എന്നത് കടമുറിയാക്കാനുള്ള ശ്രമങ്ങളും സംബന്ധിച്ചു സമഗ്ര അന്വേഷണം നടത്തണമെന്നും സമിതി ആവശ്യപ്പെട്ടു. പനമ്പിള്ളി നഗറിലെ വീടുകള്‍ വ്യാപാര സ്ഥാപനങ്ങളാക്കിയത് നിയമവിരുദ്ധമാണെന്ന് വിധി പറഞ്ഞ ഹൈക്കോടതി വീട്ടില്‍ മദ്യക്കച്ചവടം നടത്താന്‍ അനുവാദം നല്‍കിയത് വിവേചനപരവും അധികാരപരിധിക്ക് പുറത്തുള്ളതും നഗരസഭയുടെ സ്വയംഭരണ അധികാരത്തിലുള്ള കടന്ന് കയറ്റവുമാണെന്നും ആവശ്യം വന്നാല്‍ മദ്യനിരോധന സമിതി കേസില്‍ കക്ഷി ചേരുമെന്നും രക്ഷാധികാരി വി.ജെ ഹൈസിന്ത് പറഞ്ഞു.