ന്യൂഡല്‍ഹി: ബംഗ്ലാദേശ് തലസ്ഥാനമായ ധാക്കയിലുണ്ടായ തീവ്രവാദി ആക്രമണത്തില്‍ കൊല്ലപ്പെട്ട ഇന്ത്യക്കാരി താരിഷി ജെയിനിന്റെ മൃതദേഹം ഡല്‍ഹിയിലെത്തിച്ച് സംസ്‌കരിച്ചു. ധാക്കയിലെ ഗുല്‍ഷനിലെ സ്പാനിഷ് ബേക്കറിയായ ഹോളി ആര്‍ട്ടിസാനിലുണ്ടായ തീവ്രവാദി ആക്രമണത്തിലാണ് 19കാരിയായ താരിഷിയടക്കം 20 പേര്‍ കൊല്ലപ്പെട്ടത്. കഴിഞ്ഞ വെള്ളിയാഴ്ചയായിരുന്നു ആക്രമണം. ഇന്നലെ ഡല്‍ഹി ഗുഡ്ഗാവിലെത്തിച്ച മൃതദേഹം അന്ത്യകര്‍മങ്ങള്‍ക്കു ശേഷമാണു സംസ്‌കരിച്ചത്.
അമേരിക്കയിലെ ബെര്‍ക്‌ലിയില്‍ കാലിഫോര്‍ണിയ സര്‍വകലാശാലയില്‍ സാമ്പത്തികശാസ്ത്ര വിദ്യാര്‍ഥിനിയാണ് 19 കാരിയായ താരിഷി. അവധിക്കാലം ആഘോഷിക്കാന്‍ ബംഗ്ലാദേശില്‍ എത്തിയതായിരുന്നു. ഇവരുടെ പിതാവ് ധാക്കയില്‍ വസ്ത്രവ്യാപാരിയാണ്. താരിഷി സുഹൃത്തുക്കളായ അബിന്ദാ കബിര്‍, ഫറാസ് ഹുസൈയിന്‍ എന്നിവര്‍ക്കൊപ്പമാണ് ഹോളി ആര്‍ട്ടിസാനില്‍ എത്തിയത്.താരിഷിക്കൊപ്പം ഇവര്‍ രണ്ടുപേരും കൊല്ലപ്പെട്ടിരുന്നു.