മേപ്പാടി: കാട്ടാനശല്യത്താൽ പൊറുതിമുട്ടിയ നെല്ലിമുണ്ട നിവാസികൾക്ക് പുതിയ ഭീഷണിയായി കരടിയുടെ സാന്നിധ്യം. റിപ്പൺ വാളത്തൂരിൽ പട്ടാപ്പകൽ ജനവാസ മേഖലയിൽ കറങ്ങി നടക്കുന്ന പുള്ളിപ്പുലികളെ പേടിച്ച് പുറത്തിറങ്ങാൻ കഴിയാതെ നാട്ടുകാരും. നെല്ലിമുണ്ട ഗ്രൗണ്ടിന് സമീപത്തെ പാറപ്പുറത്താണ് കരടിക്കൂട്ടത്തെ കണ്ടത്. വെള്ളിയാഴ്ച വൈകിട്ട് അഞ്ചോടെ കരടിയെ കണ്ടത്. ജനവാസമേഖലയോട് ചേർന്ന പ്രദേശത്ത് കരടിയും രണ്ട് കുഞ്ഞുങ്ങളും സൈ്വര്യ വിഹാരം നടത്തുകയാണ്.  മാസങ്ങൾക്ക് മുൻപ് പ്രദേശത്ത് നാട്ടുകാർ കരടിയെ കണ്ടിരുന്നു. എന്നാൽ വനംവകുപ്പ് കരടിയുടെ സാന്നിധ്യം സ്ഥിരീകരിച്ചിരുന്നില്ല. രാത്രി 8.30ഓടെ പാറക്കംവയൽ സ്വദേശി കരടിയെ കണ്ടിരുന്നു. എന്നാൽ കരടിയുടെ സാന്നിധ്യം സ്ഥിരീകരിക്കാതെ കൂട് സ്ഥാപിക്കാൻ കഴിയില്ലെന്ന നിലപാടിലായിരുന്നു വനം വകുപ്പ്. ഇതിനിടയിലാണ് പട്ടാപ്പകൽ കരടിക്കൂട്ടത്തെ കാണുന്നത്. അഞ്ചുമണിയോടെ ആദ്യം ഒന്നാം കുന്നിൽ ആയിരുന്നു കരടികൾ. പിന്നീട് ജനവാസമേഖലയോട് കൂടുതൽ അടുത്ത പ്രദേശമായ രണ്ടാം കുന്നിലെത്തി. അരമണിക്കൂർ നേരമാണ് ഈ ഭാഗത്ത് കരടികൾ വിഹരിച്ചത്.

ALSO READ: നിപ; മലപ്പുറം ജില്ലയിലെ 20 വാർഡുകൾ കണ്ടൈയ്ൻമെന്റ് സോണുകളായി പ്രഖ്യാപിച്ചു

ജനവാസമേഖലയിൽ വീണ്ടും കരടിയെ കണ്ടതോടെ പ്രദേശവാസികൾ ആശങ്കയിലായി. കരടികളെ പിടികൂടാൻ അടിയന്തരമായി നടപടി സ്വീകരിക്കണമെന്നാണ് പ്രദേശവാസികൾ ആവശ്യപ്പെടുന്നത്. വിവരമറിഞ്ഞ് ഫോറസ്റ്റ് ഉദ്യോഗസ്ഥർ സ്ഥലത്ത് പരിശോധന നടത്തി. ഒന്നിൽ കൂടുതൽ കരടികൾ ഉള്ളതിനാൽ തന്നെ കൂടുവച്ച് പിടികൂടുക പ്രായോഗികമല്ലെന്നാണ് വനംവകുപ്പ് ഉദ്യോഗസ്ഥർ പറയുന്നത്. സ്ഥലത്ത് കാമറകൾ സ്ഥാപിക്കാനാണ് നീക്കം. കഴിഞ്ഞ രണ്ടാഴ്ചയ്ക്കിടെ സ്ഥിരമായി കാട്ടാന ഇറങ്ങുന്ന പ്രദേശത്താണ് കരടി കൂടിയെത്തിയത്. ഇതോടെ എന്തുചെയ്യണമെന്നറിയാത്ത അവസ്ഥയിലാണെന്ന് പ്രദേശവാസികൾ. റിപ്പൺ വാളത്തൂരിൽ കഴിഞ്ഞ ഒരാഴ്ചയോളമായി രണ്ട് പുലികളുടെ സാന്നിധ്യമുണ്ട്. കഴിഞ്ഞദിവസം വാളത്തൂർ ട്രാൻസ്‌ഫോർമറിന് സമീപത്തെ സ്വകാര്യ റിസോർട്ടിന് മുൻപിൽ രണ്ട് പുലികൾ എത്തിയിരുന്നു. പുലിയെ കണ്ടതോടെ ആളുകൾ റിസോർട്ടിൽ കയറി രക്ഷപ്പെട്ടു. ഏറെനേരം ഈ ഭാഗത്ത് പുലികൾ ഉണ്ടായിരുന്നു. കഴിഞ്ഞദിവസം വീണ്ടും പ്രദേശത്ത് പുലി എത്തിയിട്ടുണ്ട്. വളത്തൂർ വനമേഖലയിൽ നിന്നുമാണ് ഈ ഭാഗത്തേക്ക് വന്യമൃഗങ്ങൾ എത്തുന്നത്. ചാലിയാറുമായി അതിർത്തി പങ്കിടുന്ന പ്രദേശമായതിനാൽ തന്നെ കാട്ടാനശല്യവും രൂക്ഷമാണ്. ഇതിനിടയിലാണ് രണ്ടു പുലികൾ സ്ഥിരമായി ജനവാസമേഖലയിൽ എത്താൻ തുടങ്ങിയത്. പ്രദേശത്ത് ഫോറസ്റ്റ് ഉദ്യോഗസ്ഥർ പരിശോധന നടത്തി. പുലിയെ കൂടുവച്ച് പിടികൂടണം എന്നാണ് നാട്ടുകാർ ആവശ്യപ്പെടുന്നത്. 

Residents of Meppadi and Rippon areas are living in fear due to recent wildlife sightings. A bear was spotted in Nellimunda, while a tiger was seen in Valathur. Authorities have been alerted, and precautionary measures are being taken to ensure public safety. The local community is advised to remain vigilant and report any further sightings [ ].