മലപ്പുറം: മങ്കടയിൽ മരിച്ച 18കാരിക്ക് നിപ്പ സ്ഥിരീകരിച്ചതിന് പിന്നാലെ ജില്ലയിലെ 20 വാർഡുകൾ കണ്ടൈയ്ൻമെന്റ് സോണുകളായി പ്രഖ്യാപിച്ചു. മക്കരപ്പറമ്പ്, കൂട്ടിലങ്ങാടി, കുറുവ, മങ്കട എന്നീ  ഗ്രാമപഞ്ചായത്തുകളിലെ 20 വാർഡുകളാണ് കണ്ടെയ്മെന്റ് സോണുകളായായി പ്രഖ്യാപിച്ചത്. മക്കരപ്പറമ്പ് ഗ്രാമപഞ്ചായത്തിൽ ഒന്ന് മുതൽ 13 വരെയുള്ള വാർഡുകൾ, കൂട്ടിലങ്ങാടി 11, 15 എന്നീ വാർഡുകൾ, മങ്കട 14 വാർഡ്, 2,3,4,5,6 വാർഡുകൾ ആണ് കണ്ടൈയ്മെന്റ് സോണുകളായി പ്രഖ്യാപിച്ചത്.

മരണശേഷം നടത്തിയ പരിശോധനയിലാണ് 18കാരിക്ക് നിപ സ്ഥിരീകരിച്ചത്. കേരളത്തിൽ നടത്തിയ പ്രാഥമിക പരിശോധനയ്ക്ക് പുറമേ, പുണെയിലെ വൈറോളജി ലാബിൽ നടത്തിയ പരിശോധനയിലും രോഗബാധ കണ്ടെത്തി.

കഴിഞ്ഞമാസം (ജൂൺ) 28നാണ് പെൺകുട്ടിയെ കോട്ടയ്ക്കലിലെ സ്വകാര്യ ആശുപത്രിയിൽ ചികിത്സയ്ക്കായി പ്രവേശിപ്പിക്കുന്നത്. ഈ മാസം ഒന്നാം തീയതി പെൺകുട്ടിയുടെ മസ്തിഷ്‌ക മരണം സ്ഥിരീകരിച്ചു. തുടർന്ന് കോഴിക്കോട് മെഡിക്കൽ കോളജ് ആശുപത്രിയിലാണ് പോസ്റ്റ് മോർട്ടം നടത്തിയത്. നിപ സംശയത്തെത്തുടർന്ന് പോസ്റ്റ്മോർട്ടം നടത്തിയ ഡോക്ടറും മറ്റ് ജീവനക്കാരും ക്വാറന്റീനിൽ പ്രവേശിച്ചിരിക്കുകയാണ്. 

Nipah 20 wards in Malappuram district declared as containment zones