തിരുവനന്തപുരം: കടല്‍ഭിത്തി നിര്‍മാണത്തിന്റെ മറവില്‍ കോടികളുടെ തട്ടിപ്പെന്ന് ആക്ഷേപം. കഴിഞ്ഞ അഞ്ചുവര്‍ഷം കൊണ്ട് 76 കോടിരൂപ കടല്‍ഭിത്തി നിര്‍മാണത്തിന്റെ പേരില്‍ തട്ടിയെടുത്തെന്നും ഇറിഗേഷന്‍ വകുപ്പിലെ ചില ഉന്നത ഉദ്യോഗസ്ഥരും കരാര്‍ലോബിയുമാണ് ഇതിനുപിന്നിലെന്നും കേരള സ്വതന്ത്രമത്സ്യത്തൊഴിലാളി ഫെഡറേഷന്‍ ആരോപിച്ചു.
നബാര്‍ഡില്‍ നിന്നു കോടികളാണ് കടല്‍ഭിത്തി നിര്‍മാണത്തിനുവേണ്ടി കടമെടുത്തിരിക്കുന്നത്.
ചില രാഷ്ട്രീയനേതാക്കളുടെ പിന്തുണയോടെയാണ് നബാര്‍ഡില്‍ നിന്നു പണം കടമെടുക്കുന്നതെന്നും ഇതില്‍ വന്‍ അഴിമതി നടന്നിട്ടുണ്ടെന്നും ഫെഡറേഷന്‍ വര്‍ക്കിങ് പ്രസിഡന്റ് ആന്റോ ഏലിയാസ്, നാഷണല്‍ ഫിഷ് വര്‍ക്കേഴ്‌സ് ഫോറം ദേശീയ സെക്രട്ടറി ടി.പീറ്റര്‍ എന്നിവര്‍ പറഞ്ഞു.
ഉദ്യോഗസ്ഥരുടെ തട്ടിപ്പിനെക്കുറിച്ചു സമഗ്രമായ അന്വേഷണം നടത്താന്‍ സര്‍ക്കാര്‍ തയാറാകണമെന്നും ഫെഡറേഷന്‍ നേതാക്കള്‍ ആവശ്യപ്പെട്ടു. ഒരു കിലോമീറ്റര്‍ കടല്‍ഭിത്തിയുടെ നിര്‍മാണം പൂര്‍ത്തിയാകുമ്പോള്‍ ഏകദേശം എട്ടുകോടി രൂപയാണ് ചെലവാകുന്നത്.
അതേസമയം, കടലാക്രമണ ഭീഷണിയുള്ള പ്രദേശത്തെ മത്സ്യത്തൊഴിലാളികളുടെ പുനരധിവാസത്തിന് ഈ തുകയുടെ നാലിലൊന്നു പോലും ചെലവഴിക്കേണ്ടിവരില്ലെന്നും നേതാക്കള്‍ അഭിപ്രായപ്പെട്ടു.
കടലാക്രമണ പ്രദേശങ്ങളിലെ മത്സ്യത്തൊഴിലാളി കുടുംബങ്ങള്‍ക്കുള്ള പുനരധിവാസപദ്ധതി ഉടന്‍ ആരംഭിക്കുമെന്ന ഫിഷറീസ് മന്ത്രി മേഴ്‌സിക്കുട്ടിയമ്മയുടെ പ്രഖ്യാപനത്തിനു തുരങ്കംവയ്ക്കാനാണു ചില ഉദ്യോഗസ്ഥര്‍ വീണ്ടും കടല്‍ഭിത്തി നിര്‍മാണവുമായി രംഗത്തെത്തിയിരിക്കുന്നത്.
മത്സ്യത്തൊഴിലാളികളുടെ പേരുപറഞ്ഞ് ഇനിയും തട്ടിപ്പ് നടത്താന്‍ ഇറിഗേഷന്‍ വകുപ്പ് തുനിഞ്ഞാല്‍ ശക്തമായ പ്രക്ഷോഭവുമായി രംഗത്തെത്തുമെന്നും നേതാക്കള്‍ പറഞ്ഞു.