ന്യൂഡല്‍ഹി: രാജ്യത്തെ ഭൂരിഭാഗം നികുതിദാതാക്കളും നികുതി അടയ്ക്കാന്‍ താല്‍പര്യമില്ലാത്തവരാണെന്ന് സര്‍വേ. ഇക്കോണമിക് ടൈംസ് വെല്‍ത്ത് നടത്തിയ സര്‍വേയിലാണ് ഈ കണ്ടെത്തല്‍. തങ്ങള്‍ നടത്തിയ സര്‍വേയില്‍ 58 ശതമാനം ആളുകളും നികുതി അടയ്ക്കാന്‍ താല്‍പര്യമില്ലാത്തവരാണെന്ന് കണ്ടെത്തിയതായി ഇക്കോണമിക് ടൈംസ് വ്യക്തമാക്കുന്നു. എന്നാല്‍ 82 ശതമാനം ആളുകള്‍ മനപ്പൂര്‍വം നികുതി റിട്ടേണില്‍ തെറ്റായ വിവരങ്ങള്‍ ചേര്‍ക്കാത്തവരാണെന്ന് സര്‍വേ പറയുന്നു. 13.6 ശതമാനം പേര്‍ ഒന്നോ രണ്ടോ തവണ അങ്ങനെ ചെയ്തിട്ടുണ്ട്.
4.4 ശതമാനം പേര്‍ നിരന്തരം ചെയ്യുന്നുണ്ട്. ഒരു അവസരം ലഭിച്ചാല്‍ നികുതിയില്‍ നിന്ന് രക്ഷപ്പെടാമെന്ന് കരുതുന്നവരാണ് 58 ശതമാനം പേരുമെന്നും സര്‍വേ വ്യക്തമാക്കുന്നു. 54 ശതമാനം പേര്‍ കരുതുന്നത് നികുതി നിയമങ്ങള്‍ കള്ളത്തരക്കാരെ സഹായിക്കും വിധമുള്ളതാണെന്നാണ്. തങ്ങളുടെ ബന്ധുക്കളില്‍ ആരെങ്കിലും നികുതി വെട്ടിപ്പ് നടത്തിയാല്‍ അതിനെതിരായി അവരെ ഉപദേശിക്കുമെന്ന് 54.6 ശതമാനം പേര്‍ പറയുന്നു. തങ്ങള്‍ അവരെ ശക്തമായി പിന്തിരിപ്പിക്കുമെന്ന് 31.8 ശതമാനം പേര്‍ വ്യക്തമാക്കി.