മനാമ: ബഹ്‌റൈനില്‍ നോമ്പു തുറക്കാനുള്ള ഒരുക്കങ്ങള്‍ക്കിടെ കണ്ണൂര്‍ സ്വദേശി കുഴഞ്ഞു വീണു മരിച്ചു. കണ്ണൂര്‍ പെരിങ്ങത്തൂര്‍ പുളിയമ്പുറം പിലാവുള്ളതില്‍ അബ്ദുള്ള (57) ആണ് മരിച്ചത്. അദ്‌ലിയ ഭാഗത്തുള്ള താമസ സ്ഥലത്ത് നോമ്പു തുറക്കുന്നതിനുള്ള ഒരുക്കത്തിലായിരുന്നു അബ്ദുല്ലയെന്ന് സുഹൃത്തുക്കള്‍ അറിയിച്ചു. ഇതിനിടെ ദേഹാസ്വാസ്ഥ്യം അനുഭവപ്പെടുകയും കുഴഞ്ഞു വീണു മരിക്കുകയുമായിരുന്നു.

ഹൃദയാഘാതമാണ് മരണകാരണമെന്നാണ് കരുതുന്നത്. 27 വര്‍ഷമായി ബഹ്‌റൈനിലുള്ള അബ്ദുല്ല നിലവില്‍ ജവാദ് കമ്പനിയില്‍ സെയില്‍സ്മാനായി ജോലി ചെയ്യുകയായിരുന്നു. അബ്ദുല്ല അടുത്ത മാസം നാട്ടില്‍ പോകാനിരിക്കുകയായിരുന്നെന്ന് ബന്ധുക്കള്‍ പറഞ്ഞു. ബഹ്്‌റൈനില്‍ തന്നെയുള്ള കെ.എം.സി.സി ഹൂറ വൈസ് പ്രസിഡന്റ് സലിം ഹാജിയുടെ സഹോദരനാണ്് അബ്ദുല്ല. മറ്റ് സഹോദരങ്ങളായ മൊയ്ദു, അഷ്‌റഫ് എന്നിവരും ബഹ്‌റൈനിലുണ്ട്. ആയിഷയാണ് ഭാര്യ. മക്കള്‍ അസ്മന, സുമയ്യ. മൃതദേഹം നാട്ടിലേയ്ക്ക് കൊണ്ടുപോകാനുള്ള നടപടികള്‍ ബഹ്‌റൈന്‍ കെ.എം.സി.സിയുടെ നേതൃത്വത്തില്‍ പുരോഗമിക്കുകയാണ്.