മുംബൈ: ഓല ടാക്‌സി വിളിച്ച മുംബൈ സ്വദേശി സുശീല്‍ നര്‍സ്യന് ഒരിക്കലും മറക്കാനാകാത്ത ബില്ലാണ് ലഭിച്ചത്. യാത്ര ചെയ്യാത്ത 300 മീറ്റര്‍ ദൂരത്തിന് അദ്ദേഹത്തിന് ലഭിച്ച ബില്‍ 149 കോടിയുടേത്.
മുംബൈയിലെ മുലുന്ദ് വെസ്റ്റിലെ തന്റെ വസതിയില്‍ നിന്ന് വാകോല മാര്‍ക്കറ്റിലേക്ക് വിളിച്ച ടാക്‌സിക്കാണ് 149 കോടിയുടെ ബില്ല് ലഭിച്ചത്. കാര്‍ എവിടെയാണ് എത്തേണ്ടതെന്ന് കൃത്യമായ സ്ഥലം ലഭിക്കാതിരുന്ന ഡ്രൈവര്‍ സുശീലിനെ വിളിച്ചെങ്കിലും അദ്ദേഹത്തിന്റെ ഫോണ്‍ പ്രവര്‍ത്തിക്കുന്നില്ല. തുടര്‍ന്ന് ടാക്‌സി യാത്ര റദ്ദാക്കി. എന്നാല്‍ മറ്റൊരു ടാക്‌സി വിളിക്കാനൊരുങ്ങിയപ്പോഴാണ് ഞെട്ടിക്കുന്ന ബില്‍ ലഭിച്ചത്. 149 കോടിയിലേറെ രൂപ തന്റെ മൊബൈല്‍ വാലറ്റില്‍ കുടിശികയുണ്ടെന്നാണ് ഓലയില്‍ നിന്ന് ഇയാള്‍ക്ക് ലഭിച്ച വിവരം വാലറ്റിലുണ്ടായ 127 രൂപ ബില്‍ ചെയ്യപ്പെട്ടതായും വ്യക്തമായി.
തുടര്‍ന്ന് സുശീല്‍ ബില്ലിന്റെ സ്‌ക്രീന്‍ പിന്റ് ഉള്‍പ്പെടെ പരാതി സോഷ്യല്‍ മീഡിയയില്‍ പോസ്റ്റ് ചെയ്തു. ഇതോടെ ഇതൊരു സാങ്കേതിക പിഴവാണെന്ന് ഓല മറുപടി നല്‍കിയതോടെയാണ് തട്ടിപ്പല്ലെന്ന് മനസിലായതെന്ന് സുശീല്‍ പറഞ്ഞു. തുടര്‍ന്ന് രണ്ട് മണിക്കൂറിനകം സുശീലിന്റെ ബില്‍ പിന്‍വലിച്ചതായി ഓല അറിയിച്ചു.