പാലക്കാട്: വടക്കഞ്ചേരി തങ്കം ജങ്ഷനില്‍ കെ.എസ്.ആര്‍.ടി.സി ബസും സ്വകാര്യ ബസും കൂട്ടിയിടിച്ച് 20 ഓളം യാത്രക്കാര്‍ക്ക് പരുക്ക്. തിങ്കളാഴ്ച വൈകീട്ട് മൂന്നിനായിരുന്നു അപകടമുണ്ടായത്. 

പാലക്കാട് - വടക്കാഞ്ചേരി റൂട്ടില്‍ സര്‍വീസ് നടത്തുന്ന കര്‍ണന്‍ എന്ന സ്വകാര്യ ബസും കെ.എസ്.ആര്‍.ടി.സി ബസും തമ്മിലാണ് കൂട്ടിയിടിച്ചത്. തൃശ്ശൂരിലേക്ക് പോകുകയായിരുന്ന കെ.എസ്.ആര്‍.ടി.സി. സ്വകാര്യ ബസിന്റെ മുന്‍വശത്തെ ഡോറിന്റെ ഭാഗത്താണ് ഇടിച്ചത്. അപകടത്തില്‍, കെ.എസ്.ആര്‍.ടി.സി ബസിന്റെ മുന്‍ഭാഗത്തെ ചില്ല് പൂര്‍ണമായും തകര്‍ന്നു. 

പരുക്കേറ്റവരെ വിവിധ ആശുപത്രികളില്‍ പ്രവേശിപ്പിച്ചു. പരുക്കേറ്റ ആരുടെയും നില ഗുരുതരമല്ലെന്നാണ് വിവരം.