തിരുവനന്തപുരം: എയ്ഡഡ് ഹയര്‍സെക്കന്ററി ടീച്ചേഴ്‌സ് അസോസിയേഷന്റെ 28-ാം സംസ്ഥാന സമ്മേളനം നാളെ മുതല്‍ മാര്‍ച്ച്് രണ്ടുവരെ തിരുവനന്തപുരം അധ്യാപക ഭവന്‍, ജി. കാര്‍ത്തികേയന്‍ നഗര്‍ (വി.ജെ.ടി ഹാള്‍) എന്നിവിടങ്ങളില്‍ നടക്കും. നാളെ രാവിലെ പത്തു മണിക്ക് 'ഖാദര്‍ കമ്മിറ്റി റിപ്പോര്‍ട്ടും അനന്തരഫലങ്ങളും' എന്ന വിഷയത്തിലും ഉച്ചയ്ക്ക് രണ്ട് മണിക്ക് 'ഹയര്‍സെക്കന്‍ഡറി സംരക്ഷണം സമീപനവും പ്രായോഗികതയും എന്ന വിഷയത്തിലും സെമിനാറുകള്‍ നടക്കും.

മാര്‍ച്ച് ഒന്നിന് രാവിലെ 10.30 ന് അധ്യാപക ഭവനില്‍ സംസ്ഥാന പ്രസിഡന്റ് ബി. മോഹന്‍ കുമാര്‍ പതാകയുയര്‍ത്തും. പത്തിന് സംസ്ഥാന എക്‌സിക്യുട്ടീവും 11.30 ന് സംസ്ഥാന കൗണ്‍സില്‍ യോഗവും നടക്കും. ഉച്ചയ്ക്ക് 3.30ന് പ്രതിനിധി സമ്മേളനം കെ.പി.സി.സി മുന്‍ പ്രസിഡന്റ് വി. എം. സുധീരന്‍ ഉദ്ഘാടനം ചെയ്യും. മുന്‍ ഡെപ്യൂട്ടി സ്പീക്കര്‍ പാലോട് രവി മുഖ്യാതിഥിയായിരിക്കും. ഹയര്‍ സെക്കന്‍ഡറി മുന്‍ ഡയറക്ടര്‍ ജയിംസ് ജോസഫ് മുഖ്യപ്രഭാഷണം നടത്തും. രണ്ടിന് രാവിലെ 10ന് വി.ജെ.ടി ഹാളില്‍ നടക്കുന്ന പൊതുസമ്മേളനം കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ ഉദ്ഘാടനം ചെയ്യും. കെ. മുരളീധരന്‍ എം.എല്‍. എ മുഖ്യാതിഥിയാകും. ഡി.സി.സി പ്രസിഡന്റ് നെയ്യാറ്റിന്‍കര സനല്‍ മുഖ്യപ്രഭാഷണം നടത്തും. വിദ്യാഭ്യാസ സാസ്‌കാരിക സമ്മേളനം ശശി തരൂര്‍ എം.പി ഉദ്ഘാടനം ചെയ്യും. വി.എസ്.ശിവകുമാര്‍ എം.എല്‍.എ മുഖ്യാതിഥിയാകും. ജോര്‍ജ് ഓണക്കൂര്‍ മുഖ്യപ്രഭാഷണം നടത്തും.