ഹരിപ്പാട്: പരുക്കേറ്റ രോഗിക്ക് ആംബുലന്‍സ് സഹായം നല്‍കിയില്ലെന്ന് ആരോപണം. ഹരിപ്പാട് ഗവ. ആശുപത്രിയിലാണ് സംഭവം. കെ.എസ്.ആര്‍.ടി.സി ബസ് സ്റ്റേഷന്റെ തെക്കുവശം പ്രവര്‍ത്തിക്കുന്ന ലക്ഷ്മി ഹോട്ടല്‍ ഉടമ വെട്ടുവേനി ചാപ്രായില്‍ വിശ്വംഭരനാ(49)ണ് ആംബുലന്‍സ് അനുവദിക്കാതിരുന്നത്.
രാത്രി ഹോട്ടല്‍ അടച്ചു കൊണ്ടിരിക്കുന്നതിനിടയില്‍ അലമാരയുടെ ചില്ല് പൊട്ടി ഇടതു കൈയ്ക്ക് മാരകമായി പരിക്കേറ്റു. ഉടന്‍ തന്നെ സമീപത്തുള്ള ഗവ. ആശുപത്രിയില്‍ എത്തിച്ചു. തുടര്‍ന്ന് നടത്തിയ പരിശോധനയില്‍ ഞരമ്പുകള്‍ മുറിഞ്ഞിട്ടുണ്ടെന്നും ഉടന്‍തന്നെ വണ്ടാനം മെഡിക്കല്‍ കോളജ് അശുപത്രിയില്‍ കൊണ്ടുപോകണമെന്നും കൂടെയുള്ളവരോട് ഡോക്ടര്‍ പറഞ്ഞു. എന്നാല്‍ 108 ആംബുലന്‍സ് സഹായം എത്തിക്കാന്‍ ഡോക്ടര്‍ വിസമ്മതം പ്രകടിപ്പിച്ചാതായി പരാതി ഉയര്‍ന്നു.
ഏറെ നേരത്തെ തര്‍ക്കത്തിനൊടുവില്‍ വിവരമറിഞ്ഞെത്തിയ 108 ആംബുലന്‍സ് പ്രവര്‍ത്തകര്‍ തന്നെ സ്വമേധയാ രോഗിയെ വണ്ടാനത്തെത്തിക്കുകയായിരുന്നു. വണ്ടാനത്തെത്തിയപ്പോഴും അനാവശ്യം രക്ത പരിശോധനയുടെ പേരില്‍ ചികിത്സ വൈകിച്ചതായും ബന്ധുക്കള്‍ പരാതിപ്പെട്ടു.