വലന്‍സിയ: കോപ ഡെല്‍റേ ഫൈനലില്‍ ബാഴ്‌സലോണയും വലന്‍സിയയും തമ്മില്‍ ഏറ്റുമുട്ടും. ഇന്നലെ നടന്ന രണ്ടാം സെമിഫൈനലില്‍ റയല്‍ ബെറ്റിസിനെ എതിരില്ലാത്ത ഒരു ഗോളിന് തകര്‍ത്താണ് വലന്‍സിയ സൂപ്പര്‍ പോരാട്ടത്തിന് യോഗ്യത നേടിയത്. ഇരുപാദങ്ങളിലുമായി 3-2നാണ് വലന്‍സിയയുടെ വിജയം.

വലന്‍സിയയുടെ മൈതാനത്ത് നടന്ന മത്സരത്തില്‍ മികച്ച പ്രകടനം പുറത്തെടുത്തത് റയല്‍ ബെറ്റിസായിരുന്നു. 69 ശതമാനം പന്ത് കൈവശംവച്ച അവര്‍ ലക്ഷ്യത്തിലേക്കായി അഞ്ച് ഷോട്ടുകളുമുതിര്‍ത്തു. വലന്‍സിയ ഒറ്റ ഷോട്ട് മാത്രമാണ് റയല്‍ ബെറ്റിസിന്റെ വല ലക്ഷ്യമിട്ട് അടിച്ചത്. അത് ഗോളായി മാറുകയും ചെയ്തു.

56ാം മിനുട്ടില്‍ റോഡ്രിഗോയാണ് വലന്‍സിയയുടെ വിജയഗോള്‍ നേടിയത്. നേരത്തെ റയല്‍ ബെറ്റിസിന്റെ മൈതാനത്ത് നടന്ന ആദ്യ പാദ സെമിഫൈനലില്‍ ഇരുടീമുകളും രണ്ട് ഗോള്‍ വീതം നേടി സമനില പാലിക്കുകയായിരുന്നു. മികച്ച പ്രകടനം പുറത്തെടുത്തിട്ടും റയല്‍ ബെറ്റിസിന് പരാജയമായിരുന്നു ഫലം. മെയ് 25നാണ് ഫൈനല്‍. റയല്‍ ബെറ്റിസിന്റെ മൈതാനത്ത് വച്ചാണ് മത്സരം.