ഹൈദരാബാദ്: ടി20യില്‍ ആസ്‌ത്രേലിയയോടേറ്റ അപ്രതീക്ഷിത തോല്‍വിക്ക് മറുപടി നല്‍കാന്‍ കോഹ്‌ലിയും സംഘവും ഇന്ന് പരമ്പരയിലെ ആദ്യ ഏകദിന മത്സരത്തിനിറങ്ങും. അഞ്ച് മത്സരങ്ങളടങ്ങിയ പരമ്പരയിലെ ആദ്യ മത്സരത്തിനാണ് ഹൈദരാബാദിലെ രാജീവ് ഗാന്ധി സ്റ്റേഡിയത്തില്‍ ഉച്ചക്ക് 1.30തോടെ തുടക്കമാവുക.

രണ്ടു മത്സരങ്ങളുടെ ടി20 പരമ്പരയില്‍ ഓസീസിനോടേറ്റ തോല്‍വിക്കു ഏകദിനത്തില്‍ കണക്കു ചോദിക്കാനുറച്ചാവും കോഹ്‌ലിപ്പട ഇറങ്ങുക. രണ്ടു മത്സരങ്ങളുടെ പരമ്പരയില്‍ ഇന്ത്യയെ ഞെട്ടിച്ചുകൊണ്ടാണ് ഓസീസ് കിരീടം സ്വന്തമാക്കിയത്. ഇന്ത്യന്‍ മണ്ണില്‍ അവരുടെ ആദ്യത്തെ ടി20 പരമ്പര നേട്ടം കൂടിയായിരുന്നു ഇത്. ഇംഗ്ലണ്ടില്‍ നടക്കാനിരിക്കുന്ന ലോകകപ്പിന് മുന്‍പ് ഇന്ത്യയുടെ അവസാന ഏകദിന പരമ്പരയാണ് ഇന്ന് ആരംഭിക്കുന്നത്. അതുകൊണ്ടു തന്നെ ജയത്തോടെ ലോകകപ്പിനായി ഇംഗ്ലണ്ടിലേക്കു പറക്കാനായിരിക്കും ഇന്ത്യയുടെ ശ്രമം. ടി20യിലേറ്റ ഷോക്ക് ഏകദിനത്തില്‍ ഏല്‍ക്കാതിരിക്കാന്‍ ഇന്ത്യക്ക് ഏറ്റവും മികച്ച കളി പുറത്തെടുത്തേ തീരൂ.

ബൗളിങ്ങില്‍ പേരുകേണ്ട ഇന്ത്യ ടി20യില്‍ ബൗളര്‍മാരുടെ മോശം പ്രകടനം കാരണമാണ് ജയിക്കാവുന്ന കളി കൈവിട്ടത്. രണ്ടാം ടി20യില്‍ ജയിക്കാവുന്ന മത്സരത്തില്‍ ചഹല്‍, സിദ്ധാര്‍ഥ് കൗള്‍, വിജയ് ശങ്കര്‍ എന്നിവരെല്ലാം റണ്‍സ് കൊടുത്തതോടെ ഓസീസ് അനായാസം വിജയത്തിലെത്തുകയായിരുന്നു. മാക്‌സ്‌വെല്ലിന്റെ ഒറ്റയാള്‍ പ്രകടനമാണ് ഓസീസിനെ രക്ഷിച്ചത്. ജസ്പ്രീത് ബുംറയൊഴികെ ബൗളിങില്‍ മറ്റാരും തിളങ്ങിയില്ല. കുല്‍ദീപ് യാദവ്, ഭുവനേശ്വര്‍ കുമാര്‍, മുഹമ്മദ് ഷമി എന്നിവര്‍ക്കെല്ലാം ടി20 പരമ്പരയില്‍ വിശ്രമം നല്‍കിയിരുന്നു. ഇവരില്‍ ഷമിയും കുല്‍ദീപും ഏകദിന പരമ്പരയില്‍ തിരിച്ചെത്തും. ഭുവി അവസാന മൂന്നു ഏകദിനങ്ങളില്‍ മാത്രമേ കളിക്കുകയുള്ളൂ. ഷമിയുടെയും കുല്‍ദീപിന്റെയും മടങ്ങിവരവ് ഏകദിനത്തില്‍ ഇന്ത്യന്‍ ബൗളിങിന്റെ മൂര്‍ച്ച വര്‍ധിപ്പിക്കുമെന്നുറപ്പാണ്.

ടി20യില്‍ നിറംമങ്ങിയ യുവതാരം റിഷഭ് പന്തിനെ ആദ്യ ഏകദിനത്തില്‍ പ്ലെയിങ് ഇലവനില്‍ നിന്നൊഴിവാക്കാനാണ് സാധ്യത. ടി20 പരമ്പരയില്‍ ഇന്ത്യന്‍ നിരയിലെ ഏറ്റവും വലിയ ഫ്‌ളോപ്പ് പന്തായിരുന്നു. അതേസമയം, ടി20യില്‍ രണ്ടു മത്സരങ്ങളിലും തിളങ്ങി ഫോമിലേക്കു തിരിച്ചെത്തിയ ലോകേഷ് രാഹുലിന് ആദ്യ ഏകദിനത്തിലും അവസരം ലഭിക്കും.