എരുമപ്പെട്ടി: മണ്ണാംകുന്ന് കാഞ്ഞങ്ങാട്ട്പടി റോഡിന്റെ നിര്‍മാണ പ്രവര്‍ത്തനം വാര്‍ഡ് മെംബറും നാട്ടുകാരും ചേര്‍ന്ന് തടഞ്ഞു. തുടര്‍ന്ന് ഒരുവിഭാഗം നാട്ടുകാരും വാര്‍ഡ് മെംബറും ചേരിതിരിഞ്ഞുണ്ടായ വാക്ക് തര്‍ക്കം സംഘര്‍ഷാവസ്ഥ സൃഷ്ടിടിച്ചു.
20ഓളം കുടുംബങ്ങള്‍ താമസിക്കുന്ന മണ്ണാംകുന്ന് റോഡ് നിര്‍മാണത്തിന് അനുമതി നല്‍കാതെ ഒരു വീട്ടിലേക്കുള്ള വഴി റോഡാക്കുന്നതിന് അഞ്ചുലക്ഷം രൂപ അനുവദിച്ചുവെന്നാരോപിച്ചാണ് പ്രവര്‍ത്തനം തടഞ്ഞത്.
ഗ്രാമസഭയില്‍ ഇവര്‍ അപേക്ഷ സമര്‍പ്പിച്ചിരുന്നില്ല. വാര്‍ഡ് മെംബര്‍ പോലും അറിയാതെയാണ് റോഡിന്റെ നിര്‍മാണ പ്രവര്‍ത്തനങ്ങള്‍ ആരംഭിച്ചിരിക്കുന്നത്. നടപടിക്കെതിരേ ജില്ലാ കലക്ടര്‍ക്കും ജില്ലാ ജോയിന്റ് പ്രോഗ്രാം കോര്‍ഡിനേറ്റര്‍ക്കും പരാതി നല്‍കിയതിന്റെ അടിസ്ഥാനത്തില്‍ കോളനി നിവാസികള്‍ക്ക് അനുകൂല നടപടി എടുത്തിട്ടുള്ളതുമാണ്.
എന്നാല്‍ ഇതിനെയെല്ലാം മറികടന്ന് അധികാരികളുടെ ഒത്താശയോടെ പഞ്ചായത്ത് ഭരണസമിതി മണ്ണാംകുന്ന് കോളനിയിലെ ജനങ്ങളെ അവഹേളിക്കുകയാണെന്നും വാര്‍ഡ് മെംബര്‍ ദീപ രാമചന്ദ്രന്‍ പറഞ്ഞു.
അതേസമയം ഏഴ് വര്‍ഷത്തോളമായി നിരന്തരം പഞ്ചായത്തില്‍ പരാതി നല്‍കിയാണ് റോഡ് അനുവദിച്ചിട്ടുള്ളതെന്നും വാര്‍ഡ് മെംബര്‍ കോളനി നിവാസികളുമായി വന്ന് നിര്‍മാണ പ്രവര്‍ത്തനങ്ങള്‍ തടയുകയാണുണ്ടായതെന്നും പരിസരവാസികള്‍ പറഞ്ഞു. കോളനിവാസികളും നാട്ടുകാരും വാര്‍ഡ് മെംബറും തമ്മിലുള്ള തര്‍ക്കം വാക്കേറ്റത്തിനിടയാക്കി.
സംഘര്‍ഷാവസ്ഥയെ തുടര്‍ന്ന് എരുമപ്പെട്ടി അഡിഷണല്‍ എസ്.ഐ ജോണിന്റെ നേതൃത്വത്തിലുള്ള പൊലിസ് സ്ഥലത്തെത്തി സംഘര്‍ഷാവസ്ഥ നിയന്ത്രിച്ചു. പ്രതിഷേധത്തെ തുടര്‍ന്ന് റോഡിന്റെ നിര്‍മാണ പ്രവര്‍ത്തനം നിര്‍ത്തിവച്ചു.