കുവൈത്ത് സിറ്റി: 45ാമത് ജിസിസി ഉച്ചകോടിയില്‍ ഗള്‍ഫ് സഹകരണ കൗണ്‍സില്‍ (ജിസിസി) നേതാക്കള്‍ ഗസ്സയിലെ ഇസ്‌റാഈല്‍ ആക്രമണങ്ങള്‍ അവസാനിപ്പിക്കാന്‍ ആഹ്വാനം ചെയ്യുകയും വെടിനിര്‍ത്തല്‍ പ്രഖ്യാപിച്ചിട്ടും ലെബനനിലെ ഇസ്‌റാഈല്‍ തുടരുന്ന ആക്രമണങ്ങളെ അപലപിക്കുകയും ചെയ്തു.

ഉച്ചകോടിയുടെ സമാപനത്തില്‍ കുവൈത്ത് പുറത്തിറക്കിയ പ്രഖ്യാപനത്തില്‍ ഗസ്സയിലെ സാധാരണക്കാരുടെ കൊലപാതകങ്ങളും കൂട്ട കൊലപാതകങ്ങളും അവസാനിപ്പിക്കാന്‍ ആവശ്യപ്പെടുകയും സംഘര്‍ഷം അവസാനിപ്പിക്കാന്‍ വെടിനിര്‍ത്തല്‍ ചര്‍ച്ചകള്‍ക്കായി നിലകൊള്ളുകയും കിഴക്കന്‍ ജറുസലേമിനെ തലസ്ഥാനമാക്കി സ്വതന്ത്ര ഫലസ്തീന്‍ രാഷ്ട്രം സ്ഥാപിക്കുന്നതിനുള്ള പിന്തുണ നേതാക്കള്‍ ആവര്‍ത്തിക്കുകയും ചെയ്തു.

പ്രാദേശികമായും ആഗോളമായും രാഷ്ട്രീയ, സുരക്ഷ, സാമ്പത്തിക വെല്ലുവിളികളെ അഭിമുഖീകരിക്കുന്നതില്‍ കൂട്ടായ്മയുടെ പങ്ക് ജിസിസി നേതാക്കള്‍ എടുത്തുപറഞ്ഞു. അന്താരാഷ്ട്ര നിയമങ്ങള്‍ക്കനുസൃതമായി തര്‍ക്കങ്ങള്‍ പരിഹരിക്കുന്നതില്‍ നയതന്ത്രത്തിന്റെയും സംഭാഷണത്തിന്റെയും പ്രാധാന്യം ജിസിസി നേതാക്കള്‍ ഊന്നിപ്പറഞ്ഞു.