മുംബൈ: പൂനെയിലെ റസ്റ്റോറന്റിനെതിരെ അമേരിക്കൻ ഫാസ്റ്റ് ഫുഡ് ശൃംഖലയായ 'ബർഗർ കിങ്' നടത്തുന്ന ട്രേഡ് മാർക്ക് ദുരുപയോ​ഗ കേസിൽ ഇടക്കാല വിധി. ബ‍ർഗർ കിങ് എന്ന പേര് ഉപയോഗിക്കുന്നതിൽ നിന്ന് പൂനെയിലെ റസ്റ്റോറന്റിനെ താത്കാലികമായി വിലക്കുന്ന വിധിയാണ് ബോംബൈ ഹൈക്കോടതി ഇന്ന് പുറപ്പെടുവിച്ചത്. കേസിൽ വാദം കേട്ട് തീർപ്പാക്കും വരെ താത്കാലിക വിലക്ക് തുടരുന്നതാണ്.

ബർഗർ കിങ് എന്ന പേരിൽ പ്രവർത്തിക്കുന്ന റസ്റ്റോറന്റിനെതിരെ കമ്പനി നേരത്തെ പൂനെയിലെ കോടതിയെ സമീപിച്ചിരുന്നെങ്കിലും 1992 മുതൽ പ്രവർത്തിക്കുന്ന റസ്റ്റോറന്റാണ് ഇതെന്നും അമേരിക്കൻ ഫാസ്റ്റ് ഫുഡ് ശൃംഖലയായ ബർഗർ കിങ് അക്കാലത്ത് ഇന്ത്യയിൽ ഫ്രാഞ്ചൈസികൾ തുറന്നിട്ടില്ലെന്നും ചൂണ്ടിക്കാട്ടിയാണ് കോടതി ഹർജി തള്ളിയത്. ഇതിനെതിരെ ബർഗർ കിങ് ബോംബൈ ഹൈക്കോടതിയെ സമീപിച്ചാണ് ഇപ്പോൾ ഇടക്കാല വിധി നേടിയിരിക്കുന്നത്. 

അന്നാൽ ഈ കേസിൽ തീർപ്പാകുന്നത് വരെയുള്ള ഇടക്കാല വിധി മാത്രമാണിതെന്നും എല്ലാ തെളിവുകളും വിശദമായി പരിശോധിക്കുകയും വിശദമായി വാദം കേൾക്കുകയും ചെയ്യേണ്ടതുണ്ടെന്നും ജസ്റ്റിസ് എ.എസ് ചന്ദ്രുകർ, രാജേഷ് പാട്ടിൽ എന്നിവരടങ്ങിയ ഡിവിഷൻ ബെ‌ഞ്ച് പറഞ്ഞു. അത് പൂർത്തിയാവുന്നത് വരെ ഇടക്കാല ഉത്തരവ് നിലനിൽക്കുമെന്നും കോടതി അറിയിച്ചു. കഴി‌ഞ്ഞ പത്ത് വർഷത്തെ സാമ്പത്തിക ഇടപാടുകളുടെയും നികുതി അടച്ചതിന്റെയും രേഖകൾ സൂക്ഷിക്കണമെന്നും കോടതി രണ്ട് കമ്പനികളോടും ആവിശ്യപ്പെട്ടു. അമേരിക്കൻ ഫാസ്റ്റ് ഫുഡ് ശൃംഖലയായ 'ബർഗർ കിങിന്'  നിലവിൽ ഇന്ത്യയിൽ നാനൂറോളം റസ്റ്റോറന്റുകളാണുള്ളത്. ഇവയിൽ ആറെണ്ണം പൂനെയിലുമുണ്ട്.