തിരുവനന്തപുരം: ലോക്‌സഭാ തിരഞ്ഞെടുപ്പില്‍ കേരളത്തിലെ 20 മണ്ഡലങ്ങളിലേക്കുള്ള ഇടതുമുന്നണി സ്ഥാനാര്‍ഥികളെ അടുത്ത വെള്ളിയാഴ്ചയോടെ തീരുമാനിക്കും. സി.പി.ഐ രണ്ടു മണ്ഡലങ്ങളില്‍ സ്ഥാനാര്‍ഥിമാരെ ഏകദേശം ഉറപ്പിച്ചതായാണ് സൂചന.
തിരുവനന്തപുരത്ത് മുന്‍ മന്ത്രിയും എം.എല്‍.എയുമായ സി.ദിവാകരനെയും, തൃശൂരില്‍ ജനയുഗം എഡിറ്റര്‍ രാജാജി മാത്യു തോമസിനെയുമാണ് അന്തിമമായി തീരുമാനിക്കുന്നതെന്നറിയുന്നു.

വയനാട്ടില്‍ സത്യന്‍ മൊകേരിയുടെ പേരും ഭാര്യ പി.വസന്തത്തിന്റെ പേരുമാണ് അന്തിമ പരിഗണനയില്‍. മാവേലിക്കര അന്തിമ പേര് ചിറ്റയം ഗോപകുമാറില്‍ എത്തി നില്‍ക്കുന്നുവെങ്കിലും ദേശീയ കൗണ്‍സില്‍ അംഗമായ മുന്‍ എം.എല്‍.എ എന്‍.രാജന്റെ പേരും പരിഗണിക്കണമെന്ന് ദേശീയ നേതൃത്വം ആവശ്യപ്പെട്ടിട്ടുണ്ട്.
ഇന്ന് സി.പി.ഐ സംസ്ഥാന എക്‌സിക്യൂട്ടീവും നാളെ സംസ്ഥാന കൗണ്‍സിലും ചേര്‍ന്ന് തിരുവനന്തപുരം, മാവേലിക്കര, തൃശൂര്‍, വയനാട് മണ്ഡലങ്ങളിലേക്കുള്ള പാര്‍ട്ടി സ്ഥാനാര്‍ഥി പട്ടികക്ക് രൂപം നല്‍കും. കൗണ്‍സില്‍ യോഗങ്ങളാവും അന്തിമ പട്ടിക പ്രഖ്യാപിക്കുക.

സ്ഥാനാര്‍ഥി നിര്‍ണയ ചര്‍ച്ചകള്‍ക്ക് സി.പി.എമ്മും ഇന്ന് തുടക്കമിടുകയാണ്. ഇന്നും നാളെയും ഡല്‍ഹിയില്‍ ചേരുന്ന പാര്‍ട്ടി കേന്ദ്ര കമ്മിറ്റി യോഗത്തിലെ നിര്‍ദേശം കൂടി കണക്കിലെടുത്താവും സംസ്ഥാന സെക്രട്ടേറിയറ്റ്, കമ്മിറ്റി യോഗങ്ങളില്‍ അന്തിമ സ്ഥാനാര്‍ഥി പട്ടികയ്ക്ക് രൂപം നല്‍കുക. എല്‍.ഡി.എഫില്‍ സി.പി.എമ്മും, സി.പി.ഐയും ഒഴികെയുള്ള ഘടകകക്ഷികള്‍ക്കാര്‍ക്കും സീറ്റുകളുണ്ടാകില്ല.

കഴിഞ്ഞതവണ കോട്ടയം മണ്ഡലം ജനതാദള്‍ എസിന് നല്‍കിയെങ്കിലും ഇത്തവണ അതും സി.പി.എം ഏറ്റെടുക്കാനാണ് സാധ്യത. കോട്ടയത്തിന് പകരം തിരുവനന്തപുരം കിട്ടിയാല്‍ കൊള്ളാമെന്ന ആഗ്രഹം ദള്‍ ഇടയ്ക്ക് പ്രകടിപ്പിച്ചിരുന്നു.

എന്നാല്‍, തിരുവനന്തപുരം വിട്ടുകൊടുക്കില്ലെന്ന് സി.പി.ഐ ഉറച്ച നിലപാട് എടുത്തു. എ.നീലലോഹിത ദാസിനെ തിരുവനന്തപുരത്ത് മത്സരിപ്പിക്കാനായിരുന്നു ജനതാദളിന്റെ നീക്കം.
എന്നാല്‍ സി.പി.ഐ സി.ദിവാകരനെ ഇറക്കി ശക്തമായ രാഷ്ട്രീയ മത്സരത്തിനാണ് തിരുവനനന്തപുരത്ത് കളമൊരുക്കുന്നത്.

സി.പി.എമ്മും തിരുവനന്തപുരം മണ്ഡലത്തിലെ കീഴ്ഘടകങ്ങള്‍ക്ക് മുന്നണി സ്ഥാനാര്‍ഥിയ്ക്ക് വേണ്ടി ശക്തമായി പ്രവര്‍ത്തിക്കണമെന്ന് നിര്‍ദേശം നല്‍കിയിട്ടുണ്ട്. തിരുവനന്തപുരത്ത് മുന്നണി സ്ഥാനാര്‍ഥി വിജയിക്കാതിരിക്കുകയോ വോട്ട് കുറഞ്ഞാലോ സി.പി.എം ജില്ലാകമ്മിറ്റിെയ പിരിച്ചു വിടുന്നതുള്‍പ്പെടെയുള്ള നടപടികളിലേയ്ക്ക് പോകുമെന്ന ശക്തമായ താക്കീതും സി.പി.എം സംസ്ഥാന കമ്മിറ്റി നല്‍കിയിട്ടുണ്ട്.