കോഴിക്കോട്: കുറ്റവാളികളുടെ തെളിവുകള്‍ ശേഖരിക്കാന്‍ കൈവിരലില്‍ മഷി പുരട്ടി തെളിവുകള്‍ ശേഖരിക്കുന്നത് പൊലിസിന്റെ പതിവു രീതിയാണ്. എന്നാല്‍ ഇനി അതു വേണ്ട?. ഈ പരമ്പരാഗത രീതിക്ക് മാറ്റം വരുത്തിയാണ് കേരള പൊലിസ് പുതിയ സംരംഭവുമായി മുന്നോട്ടു വന്നിരിക്കുന്നത്. ഓട്ടോമേറ്റഡ് ഫിംഗര്‍ പ്രിന്റ് ഐഡന്റിഫിക്കേഷന്‍ മെഷീനുകളാണ് (എ.എഫ്.ഐ.എസ്) ഇതിനു പരിഹാരമായി പൊലിസ് സ്റ്റേഷനുകളില്‍ സ്ഥാപിച്ചിരിക്കുന്നത്.
ജില്ലയിലെ മൂന്നു പൊലിസ് സ്റ്റേഷനുകളില്‍ ആദ്യപടിയായി മെഷീനുകള്‍ സ്ഥാപിച്ചു. ഇന്നലെ മുതല്‍ ഇതിന്റെ പ്രവര്‍ത്തനങ്ങളും ആരംഭിച്ചു കഴിഞ്ഞു. നഗരത്തിലെ പ്രധാന പൊലിസ് സ്റ്റേഷനുകളായ ടൗണ്‍, കസബ, നടക്കാവ് എന്നിവിടങ്ങളിലാണ് മെഷീന്‍ സ്ഥാപിച്ചിരിക്കുന്നത്. കോഴിക്കോട് റൂറല്‍ പൊലിസ് ജില്ലാ പരിധിയിലും കഴിഞ്ഞ ദിവസം മുതല്‍ പുതിയ സംവിധാനം തുടങ്ങി. ദിവസം മുഴുവന്‍ പ്രവര്‍ത്തിക്കുന്ന ഹൈ റെസല്യൂഷന്‍ ഫിംഗര്‍ പ്രിന്റ് സ്‌കാനറുകളാണ് ഇവിടെ സ്ഥാപിച്ചിരിക്കുന്നത്.
കസ്റ്റഡിയിലുള്ള പ്രതി സ്‌കാനറില്‍ വിരല്‍ അമര്‍ത്തിയാല്‍ പ്രതിയുടെ ക്രിമിനല്‍ ചരിത്രം, മുന്‍പത്തെ കേസുകള്‍, രജിസ്റ്റര്‍ ചെയ്ത കേസുകള്‍ തുടങ്ങി മുഴുവന്‍ ചരിത്രവും സ്‌ക്രീനില്‍ തെളിഞ്ഞുവരും. വിരലിനു പുറമെ കൈപ്പത്തിയുടെ വിശദാംശങ്ങളും സ്‌കാനറില്‍ ശേഖരിക്കുന്നുണ്ട്. സ്‌കാനറുകള്‍ കംപ്യൂട്ടറിലേക്ക് ഘടിപ്പിച്ച് വിവരങ്ങള്‍ കൈമാറുമ്പോള്‍ അപ്പോള്‍ തന്നെ തിരുവനന്തപുരത്ത് പൊലിസ് ആസ്ഥാനത്ത് വിവരങ്ങള്‍ രേഖപ്പെടുത്തും.
സി-ഡാക്കാണ് മെഷിനുകള്‍ പൊലിസ് സ്റ്റേഷനുകളില്‍ പ്രവര്‍ത്തന ക്ഷമമാക്കിയത്. ജപ്പാന്‍ നിര്‍മിത സ്‌കാനറുകളാണ് ഇപ്പോള്‍ സ്‌റ്റേഷനുകളില്‍ എത്തിച്ചിരിക്കുന്നത്. യു.എസ് ഫെഡറല്‍ ബ്യൂറോ ഓഫ് ഇന്‍വസ്റ്റിഗേഷന്‍ (എഫ്.ബി.ഐ) അംഗീകാരം നല്‍കിയ സ്വകാര്യ കമ്പനിയാണിത്. സംസ്ഥാനത്തെ 20 ഫിംഗര്‍ പ്രിന്റ് ബ്യൂറോകളെയും ബന്ധിപ്പിക്കുന്ന രീതിയിലാണ് സംവിധാനം രൂപ്പെടുത്തിയിരിക്കുന്നത്.  എറ്റവും കൂടുതല്‍ കുറ്റകൃത്യങ്ങള്‍ നടക്കുന്ന സ്റ്റേഷന്‍ പരിധിയിലാണ് ആദ്യഘട്ടത്തില്‍ മെഷീനുകള്‍ സ്ഥാപിച്ചത്. ആദ്യഘട്ടമെന്ന നിലയില്‍ സംസ്ഥാനത്തെ അഞ്ഞൂറോളം പൊലിസ് സ്റ്റേഷനുകളിലാണ് ആധുനിക സംവിധാനമുള്ള മെഷീന്‍ ഇന്നലെ മുതല്‍ പ്രവര്‍ത്തനമാരംഭിച്ചത്. സംസ്ഥാനത്തെ മുഴുവന്‍ പൊലിസ് സ്റ്റേഷനുകളിലും പദ്ധതി നടപ്പിലാക്കാനാണ് തീരുമാനം.