കാഞ്ഞങ്ങാട്: ഇരുചക്രവാഹനമോഷ്ടാവ് ഒടുവില്‍ പൊലിസിന്റെ പിടിയിലായി. കാസര്‍കോട് ചട്ടഞ്ചാല്‍ തെക്കില്‍ സ്വദേശി നവാസിനെ(30)യാണ് ഇന്നലെ രാവിലെ കാഞ്ഞങ്ങാട് ബസ് സ്റ്റാന്‍ഡില്‍ വച്ച് പൊലിസ് പിടികൂടിയത്.
കോട്ടച്ചേരി പെട്രോള്‍ പമ്പിനു സമീപത്തെ തുണിക്കടയുടമ, സ്വകാര്യധനകാര്യ സ്ഥാപനത്തിലെ പിഗ്മി കലക്ടര്‍ അതിയാമ്പൂരിലെ ഗണപതി, മണിവെസല്‍പാലസ് ഉടമ സുരേഷ് എന്നിവരുടെ സ്‌കൂട്ടറുകളാണ് കഴിഞ്ഞ ദിവസങ്ങളില്‍ മോഷ്ടിക്കപ്പെട്ടത്. മണിവെസല്‍ പാലസിലെ സ്‌കൂട്ടര്‍ മോഷ്ടിക്കുന്നതിനിടയില്‍ ഇയാളുടെ ചിത്രം കടയിലെ സി.സി.ടി.വിയില്‍ പതിഞ്ഞിരുന്നു. ഇത് വാട്‌സാപില്‍ വ്യാപകമായി പ്രചരിച്ചിരുന്നു.
ഇന്നലെ രാവിലെ ബസ് സ്റ്റാന്‍ഡില്‍ എത്തിയ നവാസിനെ ബസ് സ്റ്റാന്‍ഡിലെ തൊഴിലാളി സുരേന്ദ്രന്‍ തിരിച്ചറിയുകയും ഡ്യൂട്ടിയിലുണ്ടായിരുന്ന ഹോം ഗാര്‍ഡിനോടുപറയുകയുമായിരുന്നു. ഹോം ഗാര്‍ഡ് പൊലിസിനെ വിളിച്ചു. ഇതിനിടയില്‍ ഓടി രക്ഷപ്പെടാന്‍ ശ്രമിച്ച നവാസിനെ പൊലിസ് പിന്തുടര്‍ന്ന് പിടികൂടി.