കല്‍പ്പറ്റ: കല്‍പ്പറ്റ നുസ്‌റത്തുദ്ധീന്‍ മുസ്‌ലിം സംഘത്തിന്റെ നേതൃത്വത്തില്‍ നടക്കുന്ന പ്രഥമ സമൂഹ വിവാഹം ഇന്ന് എച്ച്.ഐ.എം.യു.പി സ്‌കൂളില്‍ നടക്കും.
 മഹല്ലിലെ നിര്‍ധനരായ ആറ് പെണ്‍കുട്ടികളാണ് ഇന്ന് രാവിലെ ഒന്‍പതിന് മഹല്ലിന്റെ കൈത്താങ്ങില്‍ വിവാഹ ജീവിതത്തിലേക്ക് കടക്കുന്നത്.
തങ്ങളുടെ കൂടപ്പിറപ്പുകള്‍ വിവാഹപ്രായമെത്തിയിട്ടും സാമ്പത്തിക ശേഷിയില്ലാത്തതിനാല്‍ മംഗല്യ സൗഭാഗ്യം ലഭിക്കാതെ പോകുന്നത് കണ്ട്  മഹല്ല് സംവിധാനം ഒരുമയോടെ പ്രവര്‍ത്തിച്ചതിന്റെ ഫലമായാണ് ഇന്ന് ഇത്തരത്തിലുള്ള ഒരു സംഗമം നടക്കുന്നത്. കൂടപ്പിറപ്പുകളെ വിവാഹമെന്ന സ്വപ്നത്തിലേക്ക് വഴിനടത്താനായി ഒത്തൊരുമിച്ച് പ്രവര്‍ത്തിക്കുന്ന നുസ്‌റത്തുദ്ധീന്‍ മുസ്‌ലിം സംഘത്തെ എത്ര അഭിനന്ദിച്ചാലും അധികമാവില്ല.
 ഒപ്പം 3000ത്തിലധികം വരുന്ന മഹല്ല് നിവാസികളെയും. വിവാഹ സംഗമമെന്ന ആശയം കമ്മിറ്റി മഹല്ലിലെ 15 ഏരിയകളിലും കുടുംബസംഗമം വിളിച്ച് അറിയിക്കുകയായിരുന്നു.
ഇവരുടെ ഉദ്യമത്തെ ഇരു കൈയും നീട്ടി സ്വീകരിച്ച് മഹല്ല് നിവാസികള്‍ വിവാഹ സംഗമത്തിന് പണമായും സ്വര്‍ണമായും സംഭാവനകള്‍ നല്‍കി ഒപ്പം നില്‍ക്കുകയും ചെയ്തു.
ഇതോടെ സംഗമം വിജയമാക്കാനുള്ള ഊര്‍ജമാണ് കമ്മിറ്റി ഭാരവാഹികള്‍ക്ക് ലഭിച്ചത്. 10 പെണ്‍കുട്ടികളെ വിവാഹജീവിതത്തിലേക്ക് കൈപ്പിടിച്ച് നടത്തണമെന്നായിരുന്നു കമ്മിറ്റിയുടെ തീരുമാനം.
 എന്നാല്‍ ആറു കുട്ടികളാണ് ഇത്തവണയുള്ളത്. വധുവിന് വിവാഹ സമ്മാനമായി 10 പവന്‍ സ്വര്‍ണവും വിവാഹ വസ്ത്രങ്ങളും വരന് വിവാഹ വസ്ത്രവും കമ്മിറ്റി നല്‍കും. ഇനി മഹല്ലിലെ നിര്‍ധനരുടെ ഓരോ വിവാഹങ്ങള്‍ക്കും തങ്ങളാല്‍ കഴിയുന്ന രീതിയില്‍ സഹായങ്ങളെത്തിക്കാനുള്ള തീരുമാനവും കമ്മിറ്റി കൈകൊണ്ടിട്ടുണ്ട്. നാട്ടിലെ മറ്റ് മഹല്ലുകള്‍ക്കും മാതൃകയാക്കാവുന്നതാണ് കല്‍പ്പറ്റ മഹല്ലിന്റെ ഈ സദുദ്യമം.
 മൈതാനി, അമ്പിലേരി, നെടുങ്കോട്, എമിലി, എസ്.കെ.എം.ജെ, ഗൂഡലായ്കുന്ന്, ഓണിവയല്‍, കൈതക്കൊല്ലി, പുത്തൂര്‍വയല്‍, മഞ്ഞളാംകൊല്ലി, തുര്‍ക്കി, ഫാത്തിമ നൂര്‍ മസ്ജിദ്, എടഗുനി, വലിയ പള്ളി എന്നിവയാണ് മഹല്ല് കമ്മിറ്റിക്ക് കീഴിലെ പള്ളികള്‍. വിവാഹ സംഗമം സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും.
പാണക്കാട് ബഷീറലി ശിഹാബ് തങ്ങള്‍ നിക്കാഹിന് നേതൃത്വം നല്‍കും. അബ്ദുസമദ് പൂക്കോട്ടൂര്‍ മുഖ്യപ്രഭാഷണം നടത്തുന്ന ചടങ്ങില്‍ റാശിദ് ഗസ്സാലി കൂളിവയല്‍ ഉല്‍ബോധനം നടത്തും.
സമസ്ത ജില്ലാ പ്രസഡിന്റ് കെ.ടി ഹംസ മുസ്‌ലിയാര്‍, വി മൂസക്കോയ മുസ്‌ലിയാര്‍, ജഅ്ഫര്‍ ഹൈതമി, സലീം മുസ്‌ലിയാര്‍ മണ്ണാര്‍ക്കാട് സംബന്ധിക്കും. ചടങ്ങില്‍ മഹല്ല് പ്രസിഡന്റ് അഡ്വ. കെ മൊയ്തു അധ്യക്ഷനാവും