കല്‍പ്പറ്റ: ലോക്‌സഭാ തെരഞ്ഞെടുപ്പില്‍ വയനാട്ടിലെ സ്ഥാനാര്‍ഥിയെ പ്രഖ്യാപിച്ച് സി.പി.ഐ. നിലവില്‍ എല്‍.ഡി.എഫ് മലപ്പുറം ജില്ലാ കണ്‍വീനറായ പി.പി സുനീറിനെയാണ് വയനാട്ടില്‍ എല്‍.ഡി.എഫിനായി സി.പി.ഐ അങ്കത്തിനിറക്കുന്നത്.

തെരഞ്ഞെടുപ്പ് ചര്‍ച്ചകള്‍ ആരംഭിച്ച സമയത്ത് തന്നെ സി.പി.ഐയില്‍നിന്ന് വയനാട് മണ്ഡലത്തിലേക്ക് ഉയര്‍ന്നുകേട്ട പേരാണ് സുനീറിന്റേത്. നിലവില്‍ സി.പി.ഐ സംസ്ഥാന എക്‌സിക്യൂട്ടീവില്‍ വയനാട് ജില്ലയുടെ ചുമതല വഹിക്കുന്നതും സുനീറാണ്.

സംസ്ഥാന കമ്മിറ്റി തീരുമാനിച്ചതിനു തൊട്ടുപിന്നാലെ തന്നെ മണ്ഡലത്തില്‍ സജീവമാകാനുള്ള ഒരുക്കങ്ങള്‍ സുനീര്‍ ആരംഭിച്ചിട്ടുണ്ട്. ഇന്ന് രാവിലെയോടെ ജില്ലാ ആസ്ഥാനമായ കല്‍പ്പറ്റയില്‍ സുനീര്‍ എത്തുമെന്നാണ് സി.പി.ഐ കേന്ദ്രങ്ങള്‍ നല്‍കുന്ന സൂചന.

തിരുവനന്തപുരം എം.എന്‍ സ്മാരകത്തില്‍ ഇന്നലെ ചേര്‍ന്ന സംസ്ഥാന കൗണ്‍സിലിലാണ് കേരളത്തിലെ മണ്ഡലങ്ങളിലേക്കുള്ള സ്ഥാനാര്‍ഥികളെ തീരുമാനിച്ചത്. ഈ ലിസ്റ്റ്് നാഷനല്‍ കൗണ്‍സിലിനു കൈമാറും. എട്ടിന് നടക്കുന്ന നാഷനല്‍ കൗണ്‍സില്‍ യോഗത്തിനു ശേഷമായിരിക്കും ഔദ്യോഗികമായി ഡല്‍ഹിയില്‍ സ്ഥാനാര്‍ഥി പ്രഖ്യാപനം നടക്കുക.

സി.പി.ഐ സംസ്ഥാന എക്‌സിക്യൂട്ടീവ് അംഗം, കേരള പ്രവാസി ഫെഡറേഷന്‍ ജന. സെക്രട്ടറി, ഹൗസിങ് ബോര്‍ഡ് ഭരണസമിതി അംഗം എന്നീ നിലകളിലും പ്രവര്‍ത്തിക്കുകയാണ് നിലവില്‍ സുനീര്‍.

2011 മുതല്‍ 2018 വരെ സി.പി.ഐ മലപ്പുറം ജില്ലാ സെക്രട്ടറിയായിരുന്നു. പൊന്നാനി താലൂക്കിലെ മാറഞ്ചേരിയിലാണ് ജനനം. വിദ്യാര്‍ഥി രാഷ്ട്രീയത്തിലൂടെ പൊതുപ്രവര്‍ത്തനരംഗത്ത് സജീവമായ സുനീര്‍ തൃശൂര്‍ കേരളവര്‍മ കോളജില്‍ എ.ഐ.എസ്.എഫ് നേതാവായിരുന്നു. രണ്ടുതവണ കാലിക്കറ്റ് യൂനിവേഴ്‌സിറ്റി യൂനിയന്‍ വൈസ് ചെയര്‍മാനായി.

പൊന്നാനി മേഖലയില്‍ സി.പി.ഐക്ക് വേരോട്ടമുണ്ടാക്കുന്നതില്‍ നിര്‍ണായക പങ്കുവഹിച്ചിട്ടുണ്ട്. രണ്ടു തവണ പൊന്നാനി ലോക്‌സഭാ മണ്ഡലത്തില്‍ എല്‍.ഡി.എഫ് സ്ഥാനാര്‍ഥിയായി മത്സരിച്ചു. ബനാത്ത്‌വാലയ്ക്കും ഇ. അഹമ്മദിനും എതിരേയായിരുന്നു മത്സരങ്ങള്‍. മലപ്പുറം ജില്ലാപഞ്ചായത്ത് അംഗമായും പ്രവര്‍ത്തിച്ചിട്ടുണ്ട്. എടപ്പാള്‍ പൂക്കരത്തറ ഹയര്‍സെക്കന്‍ഡറി സ്‌കൂള്‍ അധ്യാപിക കെ.കെ ഷാഹിനയാണ് ഭാര്യ. മൂന്നു മക്കളുണ്ട്.