കൊച്ചി: വഖ്ഫ് സാമൂഹ്യക്ഷേമ പദ്ധതികളുടെ കുടിശ്ശിക കൊവിഡ് മഹാമാരിയുടെ പ്രത്യേക സാഹചര്യത്തില്‍ അടിയന്തിരമായി അനുവദിക്കണമെന്ന് സംസ്ഥാന വഖ്ഫ് ബോര്‍ഡ് യോഗം സര്‍ക്കാരിനോട് ആവശ്യപ്പെട്ടു. സാമൂഹ്യക്ഷേമ പദ്ധതി പ്രകാരം പെന്‍ഷന്‍, ചികിത്സാ സഹായം, വിദ്യാഭ്യാസ സഹായം തുടങ്ങിയവയാണ് വിതരണം ചെയ്തുവരുന്നത്.
നിലവിലുള്ള അപേക്ഷകര്‍ക്ക് സഹായം നല്‍കുന്നതിന് 10 കോടിയലധികം രൂപ വേണ്ടി വരും. വഖ്ഫ് ബോര്‍ഡിന്റെ തനത് ഫണ്ട് ഉപയോഗിച്ചാണ് വിദ്യാര്‍ഥികള്‍ക്കുള്ള സ്‌കോളര്‍ഷിപ്പും പ്രളയ ദുരിതാശ്വാസവും വിതരണം ചെയ്തതെന്നും യോഗം ചൂണ്ടിക്കാട്ടി.
വിഡിയോ കോണ്‍ഫറന്‍സ് വഴി നടന്ന യോഗത്തില്‍ ചെയര്‍മാന്‍ അഡ്വ: ടി. കെ ഹംസ അധ്യക്ഷനായി. അംഗങ്ങളായ പി.ഉബൈദുല്ല എം.എല്‍.എ , പി.ടി.എ റഹീം എം.എല്‍.എ, എം.സി മായിന്‍ഹാജി , അഡ്വ: പി.വി സൈനുദ്ദീന്‍, അഡ്വ: എം.ഷറഫുദ്ദീന്‍, റസിയ ഇബ്രാഹിം, ഗവ. സെക്രട്ടറി വി.കെ രഹ്‌ന, ചീഫ് എക്‌സിക്യൂട്ടീവ് ഓഫിസര്‍ ബി.എം ജമാല്‍ എന്നിവര്‍ സംബന്ധിച്ചു.