നരിക്കുനി: മടവൂര്‍ സി.എം മഖാം 28ാം ഉറൂസ് മുബാറകിന്റെ പ്രധാന ചടങ്ങായ ദിക്‌റ് ദുആ സമ്മേളനം നാളെ മഗ്‌രിബ് നിസ്‌കാരാനന്തരം മഖാം അങ്കണത്തില്‍ നടക്കും. സമസ്ത ജന. സെക്രട്ടറി കെ. ആലിക്കുട്ടി മുസ്‌ലിയാരുടെ അധ്യക്ഷതയില്‍ പാണക്കാട് സയ്യിദ് സാദിഖലി ശിഹാബ് തങ്ങള്‍ ഉദ്ഘാടനം ചെയ്യും. 

സയ്യിദ് സൈനുല്‍ ആബിദീന്‍ തങ്ങള്‍ കുന്നുംകൈ, കൊയ്യോട് ഉമര്‍ മുസ്‌ലിയാര്‍, അത്തിപ്പറ്റ മുഹ്‌യുദ്ദീന്‍കുട്ടി മുസ്‌ലിയാര്‍ തുടങ്ങിയവര്‍ സംബന്ധിക്കുന്ന പരിപാടിയില്‍ വാവാട് കുഞ്ഞിക്കോയ മുസ്‌ലിയാര്‍ ദിക്‌റ് ദുആ സമ്മേളനത്തിനും പ്രാര്‍ഥനക്കും നേതൃത്വം നല്‍കും.
ഇന്നലെ നടന്ന മതപ്രഭാഷണ വേദി സയ്യിദ് മുബശ്ശിര്‍ തങ്ങള്‍ ജമലുല്ലൈലി ഉദ്ഘാടനം ചെയ്തു. അഷ്‌റഫ് റഹ്മാനി കാസര്‍കോട് മുഖ്യ പ്രഭാഷണം നടത്തി. ഉറൂസില്‍ എം.കെ രാഘവന്‍ എം.പി മുഖ്യാതിഥിയായിരുന്നു. ഇന്ന് കാലത്ത് 9 മുതല്‍ ജാമിഅ അശ്അരിയ്യ സനദ് ദാന സമ്മേളനം നടക്കും. വൈകിട്ട് നടക്കുന്ന പൊതു സമ്മേളനം പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. എം.ടി അബ്ദുല്ല മുസ്‌ലിയാര്‍ സനദ് ദാന പ്രഭാഷണവും പി.കെ.പി അബ്ദുസ്സലാം മുസ്‌ലിയാര്‍ മുഖ്യ പ്രഭാഷണവും നടത്തും. പി.കെ കുഞ്ഞാലിക്കുട്ടി എം.പി മുഖ്യാതിഥിയാവും. സത്താര്‍ പന്തല്ലൂര്‍ സമാപന സന്ദേശം നല്‍കും. ശനിയാഴ്ച രാവിലെ മുതല്‍ വൈകുന്നേരം വരെ നടക്കുന്ന അന്നദാനത്തോടെ ഉറൂസിന് പരിസമാപ്തിയാകും. ഭക്ഷണം സ്വീകരിക്കാന്‍ വരുന്നവര്‍ പ്ലാസ്റ്റിക് കവറുകളുടെ ഉപയോഗം ചുരുക്കി പകരം സംവിധാനങ്ങള്‍ സ്വീകരിക്കണമെന്ന് സ്വാഗതസംഘം ഭാരവാഹികള്‍ ആവശ്യപ്പെട്ടു.