മോസ്‌കോ: ലോകകപ്പ് കൊണ്ടേ തിരിച്ചു പോകൂ എന്ന തീരുമാനത്തില്‍ റഷ്യയിലെത്തിയ അര്‍ജന്റീനക്ക് സ്വപ്നം സാക്ഷാത്കരിക്കണമെങ്കില്‍ ഇന്ന് ജയിച്ചേ തീരു. ആദ്യ മത്സരത്തില്‍ ഐസ്‌ലന്റിനോടേറ്റ സമനിലയാണ് അര്‍ജന്റീനയെ സമ്മര്‍ദത്തിലാക്കിയത്. ജയിക്കാമായിരുന്ന കളിയായിരുന്നിട്ടും അര്‍ജന്റീനയെ ഭാഗ്യം കടാക്ഷിച്ചില്ല. ക്രൊയേഷ്യയുമായിട്ടാണ് മത്സരമെന്നത് അര്‍ജന്റീനയുടെ നെഞ്ചിടിപ്പ് കൂട്ടുന്ന കാര്യമാണ്. ക്രൊയേഷ്യന്‍ നിരയില്‍ എല്ലാവരും ഫോമിലാണെന്നുള്ളത് ടീമിന്റെ കരുത്താണ്. ഇന്ത്യന്‍ സമയം രാത്രി 11.30നാണ് മത്സരം.

ഗ്രൂപ്പ് സിയിലെ രണ്ടാം മത്സരത്തില്‍ ഇന്ന് ഫ്രാന്‍സ് പെറുവിനെ നേരിടും. രണ്ടാം മത്സരത്തിലും ജയം തുടരാനൊരുങ്ങിയാണ് ഫ്രാന്‍സ് എത്തുന്നത്. ആദ്യ മത്സരത്തില്‍ ആസ്‌ത്രേലിയ ഫ്രാന്‍സിന് കടുത്ത വെല്ലുവിളി ഉയര്‍ത്തിയിരുന്നു. ഗോള്‍ ലൈന്‍ ടെക്‌നോളജി ഉപയോഗിച്ചായിരുന്നു ഫ്രാന്‍സിന്റെ രണ്ട് ഗോളുകളും പിറന്നത്.
ഗ്രൂപ്പ് സിയിലെ ഡെന്മാര്‍ക്ക്-ആസ്‌ത്രേലിയ മത്സരം മികച്ചൊരു പോരാട്ടം തന്നെയായിരിക്കും. കാരണം ഇരു ടീമുകള്‍ക്കും രണ്ടാം റൗണ്ടിലേക്കുള്ള സാധ്യത നിലനില്‍ക്കുന്നതിനാല്‍ ജയം മാത്രമായിരിക്കും ഇരു ടീമുകളുടേയും ലക്ഷ്യം. ഗ്രൂപ്പിലെ ആദ്യ മത്സരത്തില്‍ ഡെന്മാര്‍ക്കും ഫ്രാന്‍സും ജയിച്ച സ്ഥിതിക്ക് അടുത്ത രണ്ടു മത്സരത്തിലും ജയിച്ച് ഗ്രൂപ്പില്‍ രണ്ടാം സ്ഥാനക്കാരാകാനുള്ള ശ്രമമായിരിക്കും ഇനി നടക്കുക. ഇരു ടീമുകളുടെയും നിര്‍ണായക മത്സരമായിരിക്കും ഇന്ന് നടക്കുക.